Astana men ózge óńirlerde trassalar jabyq

ASTANA. QazAqparat – Kún raıynyń nasharlaýyna baılanysty eki óńirde trassa jabyldy, dep habarlaıdy QazAqparat Qazavtojolǵa silteme jasap.

«Aýa raıynyń kúrt nasharlaýyna baılanysty (jańbyr, qar, jel) «Astana qalasy – Qaraǵandy oblysynyń shekarasy» jáne «Aqmola oblysynyń shekarasy – Temirtaý qalasy» baǵyttary jabyq», - delingen kompanııa málimetinde.

Jańbyr, qar, qatty jel jáne kóktaıǵaqqa baılanysty barlyq kólik túrlerine jabylǵan Astanadan shyǵatyn joldar:

- respýblıkalyq mańyzy bar (Astana-Qorǵaljyn tasjolynyń 19-124 shaqyrym aralyǵy), «Astana qalasy – Qorǵaljyn aýdany» ýchaskesi;

- respýblıkalyq mańyzy bar (Ekaterınbýrg qalasy – Almaty qalasy trassasy, 1291-1353 shaqyrym aralyǵy), «Astana qalasy –Anar beketi» ýchaskesi;

- respýblıkalyq mańyzy bar (Astana – Ereımentaý – Shiderti tasjolynyń 16-200 shaqyrym aralyǵy) «Astana qalasy – Pavlodar oblysynyń shekarasy» ýchaskesi.

Saǵat 19:30-de Qostanaı oblysyndaboran men joldyń nashar kórinýine baılanysty (A-16 «Jezqazǵan - Petropavl» avtojolynyń 340-377 shaqyrym aralyǵy) Arqalyq qalasynan - Aqmola oblysynyń shekarasyna deıingi ýchaske barlyq transport úshin jabyldy.

Sondaı-aq Qazavtojoldyń Qyzylorda oblysy boıynsha fılıalynan málim etkendeı, Aqtóbe oblysyndaǵy kóktaıǵaq pen qatty jelge baılanysty respýblıkalyq mańyzy bar M-32 «Samara-Shymkent» avtomobıl jolynyń 1240-1357 shaqyrym aralyǵyna (Aqtóbe oblysynyń shekarasynan Aral aýdany ortalyǵyna deıin) barlyq kólik qozǵalysyna shekteý qoıyldy.

Eske salaıyq, sınoptıkter el óńirlerinde kún raıy buzylatyny jóninde birneshe kúnnen eskertý jarııalap jatyr. Búgin Aqtóbe oblysynda «Samara-Shymkent» tasjolynyń eki ýchaskesi áli ashylmaǵanyn jazǵan edik. Bul – «EKO Oıl» janarmaı quıý stantsııasy - Qarabutaq aýyly ýchaskesi jáne Qarabutaq aýyly - Yrǵyz aýyly ýchaskesi.

Aqmola oblysynda qatty boranda baqtashylar 100-ge jýyq jylqyny joǵaltyp alǵan.