Astana men Óskemenniń arasyndaǵy jol qysqarady

ÓSKEMEN. QazAqparat - Oblys ákimi Danıal Ahmetov óńir turǵyndary aldynda bergen esebinde Shar arqyly Óskemennen Astanaǵa júretin «Tulpar-Talgo» júrdek poıyzyn qaıta qalpyna keltirý jónindegi saýalǵa jaýap berdi, dep habarlaıdy QazAóparat tilshisi.

Óskemennen Astanaǵa qatynaıtyn atalmysh poıyz osydan bir jyl buryn toqtap qalǵan bolatyn. Shar arqyly Astanaǵa 17 saǵatta baryp júrgen ShQO turǵyndary qazir Reseıdiń Lokot stantsııasy arqyly táýlikten astam jol júrýge májbúr.

2018 jyldyń qazan aıynda ShQO ákimi Indýstrııa jáne ınfraqurylymdyq damý mınıstrligine Óskemen-Astana baǵytyndaǵy temirjol qozǵalysyn qaıta retteýdi ótinip, hat joldaýdy tapsyrǵan edi. Al oblystyq jolaýshylar kóligi jáne avtomobıl joldary basqarmasynyń basshysy Nurjan Jumadilov atalmysh máseleni sheshý joldaryn qarastyrý ústinde ekenin aıtqan bolatyn.

Kezdesýde óńir basshysy máseleniń jaqyn kúnderi tolyǵymen sheshiletinin, qazirgi ýaqytta aldyn ala kelissózder jasalyp qoıǵanyn aıtty.