Astana men Óskemende «Smart-mektepter» atty qanatqaqty jobalar iske asyryldy
ASTANA. QazAqparat - Astana qalasynyń № 64 mektebi men Óskemendegi № 2 Keshendi mektep-gımnazııa-balabaqshasynda «Samsung Smart School» qanatqaqty jobasy iske asyrylýda. Olardyń tıimdiligi búgin Nazarbaev Ýnıversıtetinde ótken «bilim berý úderisindegi oqytýdyń ınterbelsendi nysandarynyń róli» atty dóńgelek ústelde talqylandy.
«Bizdiń mektepte «Samsung Smart School» jobasy 2013 jyldyń qarashasynda iske qosylǵan bolatyn. Mundaı aqparattyq-kommýnıkatsııalyq tehnologııalardy paıdalaný oqýshylardyń yntasyn edáýir kóterip, sabaqta jasalatyn jumys kólemin ulǵaıtyp, túrli anyqtamalyq júıelerge, elektrondy kitaptarǵa jáne basqa da aqparattyq kózderge qoljetimdilikti arttyrady. Ár oqýshy óziniń plansheti arqyly basqa oqýshylarmen túrli aqparattarmen bólise alady», - dep atap ótti Óskemendegi № 2 Keshendi mektep-gımnazııa-balabaqshasynyń dırektory Kúlzıra Muhamedıeva.
Al Astanadaǵy № 64 mekteptiń 4 «v» synybynyń jetekshisi Gúlmıra Muqanovanyń aıtýynsha, atalǵan tehnologııa muǵalimniń bilim deńgeıin tekserý úderisin edáýir jeńildetip, sabaq tekserýge ketetin ýaqyt únemdeledi, sondaı-aq jańa sabaqty túsindirý kezinde túrli ınterbelsendi ıllıýstratsııalardy, dınamıkalyq qosymshalardy qoldanýǵa jol ashady.
Sarapshylardyń pikirinshe, bul jobanyń balaǵa zııandy jaqtary da joq emes. Máselen, kúni boıy ekranǵa telmirgen balanyń kóz janarynyń nasharlaýy, ortamen baılanystyń azaıýy, qolmen jazý mashyǵynyń tómendeýi, kitap oqýǵa zaýqynyń soqtaýy sııaqty máseleler atalyp ótti.
Jalpy, «aqyldy» qoǵam ıdeıasy boıynsha, ártúrli salalarda ınnovatsııalyq tehnıkalyq quraldardy, qyzmet kórsetýlerdi jáne ınternetti paıdalaný adam ómiriniń barlyq aspektilerin jaqsartýǵa negiz qalaıdy. Osy strategııa AQSh, Koreıa, Japonııa jáne kóptegen eýropalyq elder úshin etalon bolyp tabylady. Osy elderdiń bolashaqtaǵy ulttyq baılyǵynyń negizin anyqtaý barysynda Dúnıejúzilik banktiń júrgizgen zertteýleri jarııa etildi. Zertteý boıynsha bolashaqta bul elderdiń ulttyq baılynynyń tek 5 paıyzy ǵana paıdaly qazbalardan bolady. Al óndiristik kapıtal 18, olardy tıimdi paıdalaný alý bilimi men daǵdysy 77 paıyzdy quraıtyn bolady.
Esterińizge sala keteıik, Qazaqstanda bilim berý úderisinde paıdalanylatyn jańa tehnologııalar týraly «E-Learning» elektrondyq oqytý júıesin ulttyq deńgeıde endirý jónindegi qyzmetterdi bastaýǵa múmkindik bergen Memleket basshysynyń 2010 jyldyń 7 jeltoqsanyndaǵy «Qazaqstan Respýblıkasynyń 2011-2020 jyldarǵa arnalǵan bilimdi damytý» memlekettik baǵdarlamasyn maquldaý kezeńinen bastap belsendi túrde júzege asyryla bastady.
