Astana men Máskeý eýrazııalyq keńistiktegi irgeli úderisterge sheshýshi yqpal etedi — Prezıdent

ASTANA. KAZINFORM — Astana men Máskeý qatynastary búkil eýrazııalyq keńistiktegi kóptegen irgeli úderisterge sheshýshi yqpal etedi. Bul jaıynda «Rossııskaıa gazeta» basylymynda jaryq kórgen Memleket basshysy Qasym-Jomart Toqaevtyń «Máńgilik dostyq — halyqtarymyzǵa jol silter temirqazyq» degen taqyryppen berilgen avtorlyq maqalasynda aıtylǵan.

— Astana men Máskeý qatynastary búkil eýrazııalyq keńistiktegi kóptegen irgeli úderisterge sheshýshi yqpal etedi. Qazaqstan men Reseıde osy jyl ataýly mereıtoılyq is-sharalarmen aıshyqtaldy. Olardyń ishindegi eń mańyzdysy — Uly jeńistiń 80 jyldyǵy. Bul — halyqtarymyz úshin eń mańyzdy tarıhı oqıǵalardyń biri. Árbir besinshi qazaqstandyqtyń maıdanǵa attanǵany, olardyń shamamen jartysy urys dalasynda mert bolǵany belgili. Mıllıondaǵan otandasymyz — qarttar da, jastar da tylda aıanbaı eńbek etti, — dep jazady Qazaqstan Prezıdenti.

Memleket basshysy Jeńis mereıtoıyna oraı Astanada aýqymy jaǵynan buryn-sońdy bolmaǵan áskerı sherý ótkenin, sondaı-aq búkil Qazaqstan boıynsha ata-babalarymyzdyń erligine arnalǵan júzdegen estelik is-sharalary uıymdastyrylǵanyn atap ótedi.

— Qaza tapqan jaýyngerlerdiń esimin máńgi este qaldyrý baǵytynda tabandy eńbek etip júrgen Qazaqstan, Reseı jáne basqa da elderdiń erikti izdeýshilerine jeke shynaıy rızashylyǵymdy bildirgim keledi, — dedi Qasym-Jomart Toqaev.

Esterińizge sala keteıik, Prezıdent Qasym-Jomart Toqaev 11-12 qarashada Reseı Federatsııasyna memlekettik saparmen barady.