Astana men Máskeý arasyndaǵy seriktestik jan-jaqty sıpatqa ıe — reseılik sarapshy
ASTANA.KAZINFORM — Vladımır Pýtınniń Qazaqstanǵa jasaǵan memlekettik sapary eki el arasyndaǵy strategııalyq yqpaldastyqtyń joǵary deńgeıde ekenin taǵy bir márte kórsetti. Mundaı pikirdi Kazinform agenttiginiń menshikti tilshisine Reseı ǵylym akademııasynyń Qytaı jáne qazirgi Azııa ınstıtýty jetekshisi Aleksandra Permınova aıtty.
Onyń aıtýynsha, memleket basshylarynyń kelissózderi Astana men Máskeýdiń saıası dıalogty nyǵaıtýǵa, ekonomıkalyq yntymaqtastyqty keńeıtýge jáne birlesken gýmanıtarlyq jobalardy damytýǵa ózara múddeli ekenin aıqyn kórsetti.
Aleksandra Permınovanyń pikirinshe, Vladımır Pýtınniń Qazaqstanǵa memlekettik saparyn Eýrazııa keńistigindegi halyqaralyq júıeniń bólshektenýi jaǵdaıynda júrip jatqan aýqymdy saıası ózgerister aıasynda qarastyrý qajet.
— Osy turǵydan alǵanda, Qazaqstan Reseı úshin Ortalyq Azııadaǵy eń iri kórshi memleket qana emes, sonymen qatar ekonomıka, kólik, gýmanıtarlyq baılanys jáne ınstıtýtsıonaldyq yqpaldastyq salalaryndaǵy Reseı úshin asa mańyzdy úderister ótetin el, — dedi sarapshy.
Ol sondaı-aq eki el basshylarynyń bir-biriniń saıası baǵyty men turaqty damýyn qoldaýǵa qatysty málimdemelerine erekshe nazar aýdardy.
— Kóshbasshylardyń baspasóz máslıhatynda da, tar jáne keńeıtilgen quramdaǵy kelissózder barysynda da bir-birine erekshe iltıpatpen qaraǵany anyq baıqaldy, — deıdi Permınova.
Sarapshynyń sózinshe, Qazaqstan men Reseıdiń bir-biri úshin mańyzdylyǵy Qasym-Jomart Toqaevtyń Reseı prezıdentimen kezdesý kezindegi málimdemelerinen jáne Vladımır Pýtınniń «Kazahstanskaıa pravda» gazetinde jarııalanǵan maqalasynan da kórinis tapqan.
Onyń aıtýynsha, maqalada ekonomıkalyq yntymaqtastyq máselesine erekshe kóńil bólingen. Bul atom energetıkasy, ónerkásip, kólik, logıstıka, agroónerkásip kesheni jáne tsıfrlandyrý salalaryndaǵy baılanystyń belsendi damyp jatqanynan baıqalady.
— Seriktestiktiń jan-jaqty sıpaty qol qoıylǵan kelisimder toptamasynan anyq kórinedi. Sonyń ishinde bolashaqqa baǵyttalǵan óte qyzyqty jobalardyń biri — kadr daıarlaý salasyndaǵy ýaǵdalastyqtar, — dedi sarapshy.
Bul kópten beri talqylanyp júrgen «Qazaqstan — Sırıýs» bilim berý ortalyǵyn ashý jobasyna qatysty.
— Bul joba sapaly adamı jáne áleýmettik kapıtal qalyptastyrýǵa baǵyttalǵan. Bul búgingi tańda tehnologııalyq salalaryn, energetıkasyn jáne tsıfrlyq sektoryn jańǵyrtý úshin myqty kadrlyq baza qalyptastyryp jatqan Qazaqstan úshin strategııalyq turǵydan asa mańyzdy, — dep atap ótti ol.
Sarapshy qabyldanǵan sheshimder men birlesken bastamalar Qazaqstan men Reseıdiń negizgi ulttyq basymdyqtaryna tolyq sáıkes keledi dep esepteıdi. Onyń pikirinshe, qazirgi jaǵdaıda kórshiles memleketterdiń qaýipsizdigi men turaqtylyǵy ózara tyǵyz baılanysty, al eki el de yntymaqtastyqty nyǵaıtyp, ekonomıkalyq damýdy birlese ilgeriletýge múddeli.
Buǵan deıin sarapshylar Vladımır Pýtınniń Qazaqstanǵa saparyn pragmatıkalyq dıalog dep baǵalaǵan bolatyn.
