Astana men Máskeý arasynda júrgizýshisiz júk kólikteri qatynaıdy
ASTANA. KAZINFORM – Búgin elordada Memleket basshysy Qasym-Jomart Toqaev pen Reseı Prezıdenti Vladımır Pýtınge «Astana-Máskeý» alǵashqy pılotsyz júk avtomarshrýty jobasy tanystyryldy.
Qos memlekettiń kólik salasyna jaýapty mınıstrlikteri «PAO KAMAZ» pılotsyz júk kólikterimen aıryqsha jobany júzege asyrdy. Ol joǵary dáldik pen qaýipsizdik deńgeıiniń arqasynda zamanaýı logıstıka sektorynda jańa standart qalyptastyryp jatyr.
Pılotsyz júk kólikteri Astana men Máskeý aralyǵyn, ıaǵnı úsh myń shaqyrym qashyqtyqty eki kúnde júrip ótti. Osylaısha, jol uzaqtyǵyn eki eseden artyq qysqartty. Álemdik tájirıbede sonshalyqty uzaq halyqaralyq marshrýtty bulaı júrgizýshisiz tehnıkamen júrip ótý alǵash ret tirkelip otyr.
Joba zor áleýetin kórsetti. Sonyń arqasynda júk aǵyny artpaq. Taraptar pılotsyz tasymaldy odan ári damytý úshin birlesken ınstıtýtsıonaldyq baza men qajetti ınfraqurylymdy qalyptastyrýǵa kiristi.
– Júk tasymaly kólemi turaqty túrde ósip keledi. Ótken jyldyń qorytynydysy boıynsha, bul kórsetkish 92 mlrd dollarǵa jetti. Demek, 3,5%-ǵa ósken. Aldyńǵy qatarly tsıfrlyq sheshimder men jasandy ıntellekt tehnologııalaryn engizý arqyly bul kórsetkishti odan ári arttyrý josparlanyp otyr. Sonyń jarqyn mysaly – búgin elderimizdiń arasynda pılotsyz júk tasymaldaıtyn avtokólik quraldary jobasy iske qosyldy, – dedi Qasym-Jomart Toqaev.
Aıta keteıik, buǵan deıin Almaty men Astanada júrgizýshisiz taksı jobasy iske qosylatynyn jazǵanbyz.
