Astana men Qulja arasynda tikeleı áýe reısi ashylmaq
ASTANA. KAZINFORM — 26 qazanda Qazaqstannyń FlyArystan áýe kompanııasy Astana men Qytaıdyń Shyńjań-Uıǵyr avtonomııalyq aýdanynda (ShUAA) ornalasqan Qulja (Inın) qalasy arasynda turaqty tikeleı reısterdi iske qosady, dep habarlaıdy Kazinform agenttiginiń menshikti tilshisi.
Jańa reıs aptasyna úsh ret — dúısenbi, sársenbi jáne senbi kúnderi ushady. Astanadan 7:55–te ushyp shyǵady, Quljaǵa Beıjiń ýaqyty boıynsha saǵat 13:20–da qonady. Keri qaraı Quljadan 15:20–da ushyp shyǵyp, Qazaqstan astanasyna jergilikti ýaqyt boıynsha saǵat 14:50–de keledi.
FlyArystan kompanııasynyń prezıdenti jáne bas dırektory Iohan Eıdhagen Astana-Qulja reısiniń iske qosylýy áýe kompanııasynyń Qytaıdaǵy bedelin nyǵaıtyp, Qazaqstan men Qytaıdyń Shyńjań-Uıǵyr avtonomııalyq aýdany arasynda jańa tikeleı áýe baılanystaryn jaqsartatynyn atap ótti.
— Qulja bizdiń baǵyt jelilerimiz úshin mańyzdy qosymsha bolady, ol Qazaqstandy elimizben uzaq merzimdi mádenı baılanystary bar aımaqpen baılanystyrady. Jańa reıs iskerlik jáne demalys saparlaryna shyǵýdy, sondaı-aq otbasy músheleri men dostaryna barýdy jeńildetedi. Biz básekege qabiletti tarıfter arqyly áýe saparlaryn qoljetimdi etýge jáne jolaýshylarǵa óz qajettilikterine saı qyzmetterdi tańdaý múmkindigin berýge tyrysamyz, — dedi Eıdhagen.
Bul baǵyt FlyArystan-nyń Qazaqstannan Quljaǵa baratyn ekinshi baǵdary. 2025 jyly kompanııa Almaty-Qulja reısin ashqan. Qazirgi ýaqytta áýe kompanııasy Qytaıdyń Úrimshi, Qulja, Sıan jáne Chýntsın qalalaryna qatynaıdy.
Eske salsaq, FlyArystan ótken aıda Almatydan Qytaıdyń Chýntsın qalasyna tikeleı reıs ashqan bolatyn.
