«Astana» men «Qaısar» teń tústi

ASTANA. KAZINFORM - Fýtboldan Qazaqstan Premer-lıgasynyń VIII týrynda taǵy eki oıynnyń nátıjesi belgili boldy. 

Elordalyq komanda Almaty qalasynda Qyzylordanyń «Qaısar» komandasyn qabyldady. 

«Astana» ishki birinshiliktegi keıingi kezdesýlerin ala-qula ótkizip júr. Sonyń saldarynan týrnır kestesindegi jaǵdaıyn birshama qıyndatyp aldy. Bıyl bas júldege qol sozamyz degen úmitpen qanshama tájirıbeli fýtbolshylardy qatarǵa qosqan ujym úshin endi árbir kezdesýde úsh upaıǵa qol jetkizý óte mańyzdy ekeni anyq. 

Alǵashqy mınýttan tizgindi qolǵa alýǵa tyrysqan elordalyq klýb qatarynan birneshe shabýyl uıymdastyrdy. Alaıda olar birinshi kezeńde dittegen maqsatyna jetken joq. Tablodaǵy esep ózgerissiz qaldy. 

Ekinshi taımda elordalyq shabýylshy Marın Tomasov 57-mınýtta óz múmkindigin múlt jibermedi. Oǵan 93-mınýtta «Qaısar» sapynan Valerıı Gromyko bir golmen jaýap qaıyrdy. Osylaısha komandalar 1:1 esebimen teń tarqasty. 

Taǵy bir kezdesýde astanalyq «Jeńis» pen almatylyq «Qaırat» komandalary jasyl alańda kezdesti. Oıynnyń 55-mınýtynan keıin almatylyq klýbtan Arsen Býranshıev qyzyl qaǵaz alyp, alańnan qýyldy. Al bir fýtbolshy kem oınaǵanyna qaramastan 66-mınýtta «Qaırat» sapynan Ádilet Sádibekov mergendik tanytsa, 95-mınýtta Vıacheslav Shvyrev oıynnyń núktesin qoıdy. Osylaısha almatylyq klýb qarsylasyn 2:0 esebimen jeńdi. 

Aıta ketsek, buǵan deıin 11 mamyrda «Jetisý» syrt alańda «Turandy» 3:2, «Aqtóbe» «Qyzyljardy» 2:0, «Elimaı» óz alańynda «Shahterdi» 2:1 esebimen jeńip ketti.