«Astana» men «Qaırat» kezdesýi óte tartysty ótti
ASTANA. QazAqparat - Elordanyń «Astana Arena» stadıonyna jınalǵan jankúıerler ulttyq birinshiliktiń 8 týr oıyndary arasynda ótken eń qyzyqty da tartysty kezdesýdi tamashalady. Óıtkeni, alańda jeńimpaz bolýǵa basty úmitkerler «Astana» men «Qaırat» komandalary kezdesken bolatyn.
Áýeli 11 mınýtta Georgıı Jýkov esep ashty. Toǵyz mınýt ótkende «qaırattyq» Jerar Goý esepti teńestirdi. Al 37 mınýtta Baýyrjan Islamhan óz komandasyn alǵa shyǵardy. Elordalyq komandanyń jartylaı qorǵaýshysy Nemanıa Maksımovıch esepti teńestire bildi. Sóıtip, eki komanda 2:2 esebimen 15 mınýttyq úziliske shyqty. Oıynnyń ekinshi taımy da tartysqa toly boldy. 67-shi mınýtta taǵy da Jerar Goý gol soǵyp, «Qaırat» komandasyn alǵa shyǵardy. Eki mınýt ótkende Baýyrjan Jolshıev esepti teńestirdi. Al oıynnyń 82-shi mınýtynda Elorda komandasynyń shabýylshysy Tańat Nóserbaev jeńis golyn soǵyp, oıyn nátıjesin 4:3 esebimen túıindedi.
8-týr oıyndarynan keıin 15 upaı jınaǵan «Astana» komandasy kósh bastady. 14 upaılary bar «Qaırat», «Aqtóbe», «Ordabasy» komandalary týrnır kestesiniń sáıkesinshe ekinshi, úshinshi, tórtinshi oryndaryna jaıǵasty.
