«Astana» men «Qaırat» fýtboldan Qazaqstan kýbogyn shırek fınalda aıaqtady

ASTANA. KAZINFORM — 14 mamyrda fýtboldan Qazaqstan kýbogy jartylaı fınalyna joldama alǵan barlyq komanda anyqtaldy.

Alǵashqy oıynnyń birinde «Ordabasy» (Shymkent) men «Qaırat» (Almaty) kezdesti. Oıyn taǵdyryn 34-mınýtta Joao Paýlıno soqqan jalǵyz gol sheshti.

Osylaısha shymkenttik klýb qarsylasynan 1:0 esebimen basym tústi. 

Al «Qyzyljar» (Petropavl) men «Elimaı» (Semeı) kezdesýiniń negizgi jáne qosymsha kezeńinde esep ashylǵan joq. Penaltı serııasynda petropavldyq klýb jarysty jalǵastyrýǵa múmkindik aldy.

Sondaı-aq «Jeńis» (Astana) pen «Astana» kezdesýiniń negizgi kezeńinde 1:1 esebimen teń tústi. «Astana» sapynan Aleksandr Marochkın 57-mınýtta esep ashsa, «Jeńis» qatarynan Mıka 96-mınýtta tarazy basyn teńestirdi. Penaltı serııasynda «Jeńis» jartylaı fınalǵa joldama aldy.

Qostanaılyq «Tobyl» syrt alańda túrkistandyq «Turandy» 2:0 esebimen tize búktirdi. Olardyń qatarynan Davıd Enen 60, Ivan Mıladınovıch 78-mınýtta eki gol soǵyp ketti.
Endi jartylaı fınalda «Qyzyljar» men «Ordabasy», «Tobyl» men «Jeńis» oınaıdy.
Bıyl Qazaqstan kýbogyna Premer-lıga, birinshi jáne ekinshi lıgadan barlyǵy 30 komanda qatysty. Aldymen birinshi jáne ekinshi lıga komandalary alǵashqy irikteý kezeńin ótkizdi.
Olardyń arasynan irkilmeı shyqqan eki klýb 1/8 fınalda Premer-lıga komandalary qataryna qosyldy.

Jeńimpaz 2026 jyly Konferentsııa lıgasynyń ekinshi irikteý kezeńine joldama alady.