Astana men Qaraǵandydan poıyzben jolaýshylar tasymaldaý belgilengen keste boıynsha júzege asyrylýda

ASTANA. QazAqparat - 2015 jyldyń 29 jeltoqsanynda aýa raıynyń kúrt buzylýyna baılanysty Astana men Qaraǵandydan shyǵatyn avtokólik joldary jabylyp, atalǵan qalalardaǵy temirjol vokzaldarynda jolaýshylar kúrt kóbeıdi.

«Osyǵan baılanysty jergilikti atqarýshy bılik pen tasymaldaýshylar jáne vokzal ákimshiligi birlesip, jolaýshylar tasymalyn múmkindiginshe qamtamasyz etý maqsatynda jedel shtab qurdy. Sonymen Astanadan 11 929 jolaýshy tıisti baǵyttaryna, onyń ishinde 9723 adam aldyn ala satyp alǵan bıletterimen jolǵa shyqty, taǵy qosymsha 2394 jolaýshyǵa da jaǵdaı jasaldy. Osy maqsattarǵa «Astana - Almaty» jáne «Astana-Shymkent» baǵyttary boıynsha 2 jolaýshylar poıyzy uıymdastyryldy. Sonymen birge qoldanystaǵy jolaýshylar poıyzdaryna qosymsha 24 jolaýshylar vagony tirkeldi»,-delingen QR IDM habarlamasynda.

Budan bólek, Qaraǵandydan 4 985 jolaýshyǵa tıisti baǵyttarynan qalmaı jolǵa shyǵýyna jaǵdaı jasaldy. Onyń ishinde uıymnyń esebinen «Qaraǵandy-Temirtaý» baǵyttary boıynsha qosymsha poıyzdar men qosymsha vagondar uıymdastyrylyp, 1337 adam jolǵa shyqty.

Astana men Qaraǵandy vokzaldary boıynsha barlyǵy 16 914 jolaýshy jolǵa shyqsa, onyń ishinde 3731 adam qosymsha poıyzdar men vagondardyń kómegimen tasymaldandy.

«Qazirgi ýaqytta barlyq jolaýshylar poıyzdarynyń ketýi men kelýi belgilengen keste boıynsha júzege asýda»,-delingen vedomstvo málimetinde.