«Astana» men «Galatasaraı» fýtbol klýbtary arasynda birlesken jobalar iske aspaq
ASTANA. QazAqparat - Búgin "Astana" kásibı prezıdenttik sport klýby qamqorshylyq keńesiniń tóraǵasy Darhan Káletaev pen Túrkııanyń "Galatasaraı" klýby dırektorlar keńesiniń múshesi Sedat Doǵan klýbtar arasynda ózara áriptestik týraly memorandýmǵa qol qoıdy.
"Astana" men "Galatasaraı" klýbtary seriktestik baılanystaryn ornatýǵa, bıznes úderister baǵytynda tájirıbe almasýǵa daıyn ekendikterin jarııalady, dep atap kórsetilgen qujatta.
"Galatasaraı" tek Túrkııada ǵana emes, búkil dúnıejúzine tanymal klýb bolyp tabylady. Memorandým aıasynda eń basty jobalar "Galatasaraı" men "Astana" fýtbol klýbtaryna baılanysty bolady. Sondaı-aq "Astana" basketbol klýbyn damytý barysynda túrikterdiń tájirıbesin qaraıtyn bolamyz. Túrik aǵaıyndarynyń qoıyp otyrǵan ótinishteri "Astana" velokomandasyna baılanysty birneshe joba ótkizsek degen oılary bar", - deıdi Darhan Káletaev.
Onyń sózine qaraǵanda, memorandýmnan keıin jospar jasalady, sonyń negizinde ary qaraı iske kirisý josparlanýda.
"Bizdiń ózimizdiń qoıyp otyrǵan maqsatymyz - "Galatasaraıdyń" qurylymyn zertteý. Onyń quramynda 13 joba bar, qarjylandyrýdyń 80 paıyzyn "Galatasaraı" fýtbol klýby alyp otyr. Bizde soǵan birte-birte kele jatyrmyz. Bizdiń oıymyz sol qurylymǵa jaqyndaý. Biraq týra sondaı bolady dep aıtýǵa da bolmaıdy", - dep túıdi sózin ol. Aıta keteıik, "Astana" kásibı prezıdenttik sport klýby byltyr qurylǵan bolatyn. Onyń quramyna 9 sporttyq jáne 2 jeke joba enip otyr. Onyń qatarynda "Astana" veloklýby, "Astana" basketbol ujymy men "Astana" fýtbol komandasy syndy iri jobalar bar.
