Astana men Ekibastuzda terezeden qulaǵan eki bala mert boldy
ASTANA. QazAqparat - QR ІІM TJ komıteti balalardyń qaýipsizdigine qatysty eskertý jasady, dep habarlaıdy QazAqparat tilshisi.
«Qaıǵyly oqıǵalarǵa baılanysty málimetter kóptep jarııalanyp jatyr, soǵan qaramastan, mundaı jaǵdaılar áli de oryn alýda. Sýǵa túsý maýsymy taıaýda ǵana bastalsa da, balalardy qaraýsyz qaldyrý oqıǵalary jıilep barady», - dep atap ótilgen komıtet málimetinde.
Belgili bolǵandaı, Shyǵys Qazaqstan oblysynda senbi kúni bir bala men bir jigit sýǵa ketti.
Baspasóz qyzmetiniń málimetinshe, sýǵa batyp ketkenderdiń biri - jeti jasar bala. 2 maýsymda Semeı qalasynyń Bobrovka kentinde Ertis ózeninde belgilenbegen jerde shomylǵan 1998 jylǵy jigit sýǵa ketti. Sol kúni Jarma aýdany Qyzylaǵash aýylynyń Qarasý ózeninde 2012 jyly dúnıege kelgen bala arnaıy jabdyqtalmaǵan jerde sýǵa shomylmaq bolǵanda batyp ketken.
«Birinshi jaǵdaıda aǵysy qatty ózende shomylýdyń qaýipti ekendigin, sýda júze almaıtynyn eskermegen adam ajal qushsa, ekinshi qaıǵyly oqıǵada balanyń ólimi ata-ana baqylaýynsyz qalýynan oryn alǵan bolýy múmkin», - delingen habarlamada.
Munymen qosa, balalardyń terezeden qulaýy oqıǵasy qaıtalanyp otyr. Onyń biri Astanada, al ekinshisi Ekibastuzda oryn aldy.
2 maýsymda Ekibastuzdaǵy turǵyn úıde eresekterdiń qaraýynsyz qalǵan 2016 jyly týǵan bala tórtinshi qabattaǵy terezeden qulap ketti. Alǵan jaraqatynan bala aýrýhanada kóz jumdy.
Sonymen qatar dál sol kúni saǵat 13:50 kezinde Astanadaǵy Saryarqa aýdany aýmaǵyndaǵy úıdiń altynshy qabatynyń terezesinen bala qulady. Bul jaǵdaıda da 2012 jylǵy sábı aýrýhanada qaıtys boldy.
«Terezeden qulaý oqıǵalarynyń barlyǵynda da balalar joǵary qaraı ózderi órmelep shyǵady. Bul turǵyda terezege jaqyn turǵan jıhaz arqyly kóteriledi», - delingen komıtet málimetinde.
Osy oraıda TJK ókilderi úıde kishkentaı bala bolsa, terezeni ashyq kúıinde qaldyrmaý kerektigin eskertedi. Sonymen qatar qajetti qorǵanys quraldarynsyz masa (moskıt) torlary balalar úshin qaýipti bolyp tur. Sebebi terezege shyqqan kezde bala moskıt tornyna súıenip turady, sonyń saldarynan bıikten qulaý jaǵdaıy oryn alady.
Budan bólek, vedomstvo mamandary tereze mańyna jıhaz qoımaý kerektigin alǵa tartýda.
«Terezelerge qaýipsizdik qurylǵylaryn ornatý kerek nemese qulyptalatyn tutqalardy qoıǵan jón. Osy oraıda balalar óz kúshimen terezeni asha almaıdy. Degenmen de, ata-analar sábılerińizdi qaraýsyz qaldyrmaı, ózderińizben birge alyp júrińizder», - delingen TJ komıtetiniń habarlamasynda.
Foto: ndn.info
