Astana men Býrabaıdyń arasynda shaǵyn charterler qatynaýy múmkin
ASTANA. KAZINFORM — Kólik mınıstriniń orynbasary Talǵat Lastaev Aqmola oblysynyń ákimi Marat Ahmetjanovtyń Astana-Býrabaı baǵytynda áýe qatynasy ornaıtyny týraly málimetine pikir bildirdi.
— Aqmola oblysy týraly aıtsaq, ondaı málimdemeni baspasózden kórdik. Áńgime tapsyrys boıynsha qatynaıtyn charterlik marshrýttar týraly bolǵan edi. Astana men Býrabaı arasynda shaǵyn áýe kemeleri ushýy múmkin. Ondaı múmkindik bar. Instıtýtsıonaldyq turǵydan eshqandaı problema joq. Áýe kemeleri de bar. Ondaı marshrýttar paıda bolady dep oılaımyn, — dedi Talǵat Lastaev.
Kólik mınıstri Nurlan Saýranbaev ishki avıatsııa reısterin damytý bıýdjetten bólinetin dotatsııaǵa tikeleı táýeldi ekenin aıtty.
— Bizdegi ishki reısterdiń jyldyq sany 821-ge jýyqtaıdy. Bul reısterdi saqtaý arqyly óńirlerdi Almatymen, Astanamen baılanystyryp otyrmyz. Al oblystardyń óz arasynda áýe qatynasyn damytý máselesin aıtsaq, mysaly, Soltústik Qazaqstan jáne Mańǵystaý oblystarynyń ákimderi ózara reıs ashpaqshy. Ol reıster halyq qaltasyna aýyr bolmaý úshin bir reıske shamamen jylyna 400 mln teńge dotatsııa kerek. Kez kelgen oblys pen oblys arasyndaǵy ishki reıske 300-400 mln teńge dotatsııa kerek, — dedi vedomstvo basshysy.
Buǵan deıin Aqmola oblysynyń ákimi Marat Ahmetjanov Astanamen tikeleı qatynas ornatý úshin shaǵyn áýejaı ashý máselesi pysyqtalyp jatqanyn aıtqan edi.