Astana men Býdapesht arasynda tikeleı áýe reısi qaıta jandanýy múmkin

ASTANA. KAZINFORM — Qazaqstan Majarstannyń joǵary oqý oryndarymen yqpaldastyqty odan ary damytýǵa daıyn. Bul týraly Aqordada elimizge resmı saparmen kelgen Majarstan Prezıdenti Tamash Shýıokpen kelissózderden keıingi BAQ ókilderine arnalǵan brıfıngte Memleket basshysy Qasym-Jomart Toqaev aıtty.

- Bıyl Býdapeshtten Shymkentke tikeleı áýe qatynasy ashyldy. Endi eki el astanalary arasyndaǵy áýe qatynasyn qaıta ornatý múmkindigin qarastyramyz dep kelistik. Kelissóz aıasynda jasandy ıntellektini jáne tsıfrlyq tehnologııany ekonomıkaǵa jappaı engizýdiń mańyzdylyǵyna basa mán berdik. Osyǵan oraı birlese jumys isteýge daıyn ekenimizdi jetkizdik. Oǵan qosa, qarjy salasyna qatysty tyń jobalardy júzege asyrýǵa ýaǵdalastyq. Jalpy, Qazaqstanda jumys isteýge nıetti majar kompanııalary úshin qolaıly jaǵdaı jasaýǵa daıyn ekenimizdi jetkizdim. Eki eldiń ekonomıkalyq yntymaqtastyq jónindegi úkimetaralyq komıssııasy jáne iskerlik keńesi osy máselege basa mán berýi kerek dep sanaımyn, - dedi Memleket basshysy.

Prezıdent mádenı-gýmanıtarlyq baılanystar qazaq-majar qatynasynyń altyn arqaýy sanalatyndyǵyn basa aıtty.

- Osy baǵyttaǵy yntymaqtastyqty nyǵaıtý aıryqsha mańyzdy. Sondyqtan mádenıet, bilim, ǵylym salasynda birlesken jobalardy júzege asyrýǵa erekshe nazar aýdardyq. Qazirgi tańda majar eliniń úzdik joǵary oqý oryndarynda Qazaqstannyń myńnan astam stýdenti bilim alyp jatyr. Sol úshin Majarstan Úkimetine zor alǵys aıtamyn. Biz osy eldegi joǵary oqý oryndarymen yqpaldastyqty odan ary damytýǵa daıynbyz, - dedi Qasym-Jomart Toqaev.

Aıta keteıik, Qasym-Jomart Toqaev majarlyq áriptesimen keńeıtilgen quramdaǵy kelissóz barysynda Qazaqstanda birlesken jobalardy iske asyrýǵa nıetti majarlyq kásipkerlerge tolyq qoldaý kórsetiletindigin aıtqan bolatyn.