Astana men Bishkekte Kane Ýest kontserti ótýi múmkin be
ALMATY. KAZINFORM – 14 tamyzda ótetin Kane Ýest kontsertine baılanysty Almatyda baspasóz máslıhaty uıymdastyryldy.
First Media Group kompanııasynyń atqarýshy dırektory Alfııa Nurǵumarova álemdik juldyzdyń kontserti nelikten Astanada ótpeıtinin túsindirdi. Onyń aıtýynsha, basty sebepterdiń biri — elordalyq alańnyń tehnıkalyq ereksheliginde.
— Astanadaǵy stadıonda jeńil atletıkalyq jolaq joq: kórermen oryndary birden alańnyń jıeginen bastalady. Sol sebepti shoý jasaýǵa arnalǵan barlyq qajetti qural-jabdyqty ornatý jáne shoýdy osyndaı formatta ótkizý múmkin emes, — dep túsindirdi ol.
Bishkektegi kontsert rastalǵan joq
Almatyda kontsert bolatyny habarlanǵan soń, qyrǵyzstandyq BAQ-ta Kane Ýestiń jańa «Bishkek arenada» kontserti ótýi múmkin degen aqparat tarady. Alfııa Nurǵumarova bul jaǵdaıǵa túsinikteme berip, Bishkekte Dúnıejúzilik kóshpendiler oıyndary ótkennen keıin rasymen de aýqymdy kontsert uıymdastyrý múmkindigi qarastyrylǵanyn atap ótti. Bul rette Qyrǵyzstan ókilderi ártisti tańdaý boıynsha áli túpkilikti sheshim qabyldamaǵan jáne qazaqstandyq mamandardan keńes surap habarlasqan.
Sondaı-aq amerıkalyq ártistiń menedjerinen Bishkekte óner kórsetý múmkindigi suralǵan. Degenmen, qyrǵyz tarapy usynǵan kúnder ánshiniń repertýarymen sáıkes kelmegen.
— Olardan saýaldardyń shynymen túskenin bilemiz. Biraq kontsertti rastaldy deý — jaı ǵana haıp. Múmkin, osylaısha jańa stadıonǵa nazar aýdartqysy kelgen bolar, — dep atap ótti First Media Group atqarýshy dırektory.
Uıymdastyrýshylardyń málimetinshe, Kane Almatydaǵy kontsertinen keıin Indonezııada óner kórsetedi. Bishkek ártistiń resmı gastroldik kestesinde kórsetilmegen.
Eske salaıyq, buǵan deıin 14 tamyz kúni Kane Ýest Almatynyń Ortalyq stadıonynda kontsert beretini belgili boldy.
Kane Ýest kontsertine baılanysty «Qaırattyń» eýrokýboktaǵy kelesi oıyny Túrkistanǵa aýysty.
