Astana men Bratıslava arasynda mazmundy saıası dıalog ornaǵan - Prezıdent
ASTANA. KAZINFORM – Qazaq-slovak bıznes forýmy eki eldiń ózara yqpaldastyǵyn odan ary damytýǵa jol ashady. Bul týraly Slovakııa Premer-mınıstri Robert Fıtsomen kelissózderden keıingi BAQ ókilderine arnalǵan brıfıngte Memleket basshysy Qasym-Jomart Toqaev aıtty.
- Eń aldymen Slovakııa Premer-mınıstri Robert Fıtso myrzaǵa jáne barsha delegatsııa múshelerine elimizge qosh keldińizder deımin. Slovakııa Qazaqstannyń Eýropa odaǵyndaǵy mańyzdy ári senimdi seriktesi. Eki jaqty qarym-qatynasymyzdyń tarıhy mańyzdy oqıǵalarǵa toly. Qazirgi tańdaǵy eki eldiń ózara baılanystary dostyq jáne syılastyq rýhynda nyǵaıyp jatyr. Astana men Bratıslava arasynda mazmundy saıası dıalog ornaǵan, - dedi Memleket basshysy.
Prezıdenttiń aıtýynsha, eki eldiń arasyndaǵy saýda-ekonomıkalyq jáne mádenı-gýmanıtarlyq saladaǵy baılanys jyldan-jylǵa damyp kele jatyr. Sharttyq-quqyqtyq negiz qalyptasqan. Eki eldiń alys-berisi de ulǵaıyp keledi.
- Qazaqstanda 30-dan astam slovak kompanııasy tabysty jumys istep jatyr. Elimizge Slovakııanyń iri kásipkerleri de keldi. Soǵan baılanysty Robert Fıtso myrzaǵa alǵysymdy aıtamyn. Búgin bıznes forým ótedi. Bul jıyn ózara yqpaldastyǵymyzdy odan ary nyǵaıtýǵa jol ashady dep senemin, - dedi Qasym-Jomart Toqaev.
Buǵan deıin Memleket basshysy Qasym-Jomart Toqaev Slovakııa Premer-mınıstri Robert Fıtsomen shaǵyn quramda kelissóz júrgizgenin jazǵan edik.
Al keńeıtilgen quramdaǵy kelissóz barysynda Memleket basshysy Slovakııa Qazaqstannyń Eýropalyq odaqtaǵy mańyzdy ári senimdi seriktesi ekenin aıtty.