Astana men Beıjiń AÓSShK úderisiniń damý keleshegin talqylady
ASTANA. QazAqparat - Syrtqy ister mınıstri Qaırat Ábdirahmanov Qytaı SІM Azııadaǵy ózara yqpaldastyq jáne senim sharalary jónindegi keńes (AÓSShK) máseleleri jónindegi Arnaıy tobynyń jetekshisi Gý Tszypındi qabyldady, dep habarlaıdy QazAqparat QR SІM baspasóz qyzmetine silteme jasap.
Suhbat barysynda Q.Ábdirahmanov Qytaı Halyq Respýblıkasynyń AÓSShK Tóraǵasy qyzmetindegi (2014-2018 jyldar) jumysyn joǵary baǵalady.
Taraptar Forýmdaǵy Tóraǵalyqty QHR-dan Tájikstanǵa berý, Keńestiń Besinshi Sammıtin ótkizý máselelerin, sondaı-aq AÓSShK úderisin odan ári damytý keleshekterin talqylady.
Syrtqy saıası vedomstvonyń basshysy Keńestegi yntymaqtastyqtyń barlyq bes ólshemi boıynsha - áskerı-saıası, ekonomıkalyq, adamı, ekologııalyq ólshemder jáne jańa syn-tegeýrinder men qaterler salasynda is júzindegi yqpaldastyqty údetý mańyzdylyǵyn atap ótti.
«AÓSShK 4-shi Shanhaı Sammıtinde aıtylǵan Qazaqstan Respýblıkasynyń Prezıdenti Nursultan Nazarbaevtyń Keńes negizinde Azııadaǵy qaýipsizdik jáne damý uıymyn (AQDU) qurý bastamasyn, sonyń ishinde «ekinshi trek» sheńberinde jumys atqarý arqyly halyqaralyq ǵylymı jáne akademııalyq toptardy tarta otyryp, iske asyrý ózekti bolyp qalyp otyr.», - dep qosty Mınıstr.
Taraptar AÓSShK sheńberindegi ózara yqpaldastyqtyń tıimdiligi men nátıjeliligin arttyrý, sondaı-aq Forým quramynyń geografııasyn keńeıtý boıynsha jumystardy jalǵastyrý, syrtqy baılanystardy ulǵaıtý, óńirlik jáne halyqaralyq isterge keńinen qatysý qajettigi týraly bir pikirge kelisti.
AÓSShK shaqyrý týraly tuńǵysh bastamany Qazaqstan Prezıdenti N.Nazarbaev 1992 jylǵy 5 qazanda BUU Bas Assambleıasynyń 47-shi sessııasy barysynda kótergen bolatyn. Bul bastamanyń negizgi maqsaty - Azııadaǵy beıbitshilik pen qaýipsizdikti qamtamasyz etý úshin tıimdi qurylym qurý edi.
Búgingi tańda Keńeske 26 memleket múshe. Onyń jumysyna 9 memleket pen 5 halyqaralyq uıym baıqaýshy retinde qatysady. AÓSShK Hatshylyǵy Astana qalasynda ornalasqan.
Sol kúni Q. Ábdirahmanov Avstrııa Elshiligi Saýda bóliminiń ekonomıka máseleleri boıynsha Keńesshisi - "Advantage Austria" avstrııalyq halyqaralyq saýda agenttigi qurǵan, alǵash ret Almatyda ashylǵan ofıstiń basshysy Mıhael Mıýllerdi qabyldady. Kezdesý barysynda Saýda bóliminiń Qazaqstan-Avstrııa baılanystaryn tereńdetý isine qosqan úlesi atap ótildi. Saýda bóliminiń qoldaýymen Astanada 27-28 maýsymda Qazaqstan-Avstrııa aımaqtar forýmy ótip jatyr.
