Astana men Berlın yntymaqtastyqtyń strategııalyq sıpatyn rastady

BERLIN. QazAqparat - Syrtqy ister mınıstriniń orynbasary Roman Vasılenko Germanııaǵa jumys sapary barysynda atalmysh eldiń Syrtqy ister memlekettik mınıstri Nıls Annenmen jáne GFR Federaldy úkimetiniń jahandyq máseleler (BUU) jáne qarýsyzdandyrý men qarý  taratpaý jónindegi Ókili mindetin atqarýshy Rıýdıger Bonmen kezdesti. Bul týraly QR SІM baspasóz qyzmetine silteme jasap, QazAqparat habarlaıdy.

Kezdesý barysynda QR Prezıdentiniń jahandyq qaýipsizdik pen turaqty damýdy qamtamasyz etý, sonyń ishinde Astanada Reseı, QHR, EO jáne AQSh kóshbasshylarynyń halyqaralyq qaýipsizdik máselelerin talqylaý úshin sammıt uıymdastyrý týraly jaqynda usynylǵan bastamasy qarastyryldy. Taraptardyń pikirinshe, 2017-2018 jj. kezeńindegi Qazaqstannyń BUU Qaýipsizdik Keńesiniń turaqsyz múshesi retindegi qyzmeti, sondaı-aq Germanııanyń atalǵan mańyzdy halyqaralyq organdaǵy 2019-2020 jj. aldaǵy qyzmeti bul máseledegi tikeleı qatysy bar basymdyq bolýy múmkin.

Qazaqstandyq dıplomat nemis tarapyn BUU Qaýipsizdik Keńesiniń turaqsyz múshesi retinde saılanýymen quttyqtady jáne atalǵan organ aıasynda eki eldiń basymdyqtaryn júzege asyrýda taraptardyń tyǵyz ózara áreketin atap aıtty. Nemis tarapy óz kezeginde osy laýazymǵa Germanııa kandıdatýrasyn qoldaǵany úshin Qazaqstanǵa alǵys bildirdi jáne halyqaralyq uıym aıasyndaǵy tyǵyz qarym-qatynasty jalǵastyrýǵa daıyn ekendigin rastady.

2019 jyly qabyldanýy kútiletin EO-nyń Ortalyq Azııamen yntymaqtastyǵy jónindegi jańa Strategııasy týraly aıta kele, taraptar aımaqtyń iri álemdik naryqtary arasyndaǵy strategııalyq kópir retindegi róli jáne aımaqaralyq qarym-qatynastardy ary qaraı nyǵaıtý qajettigi týraly birdeı pikirge kelisti.

GFR SІM basshylyǵymen kezdesý barysynda sondaı-aq ekijaqty strategııalyq yntymaqtastyqty arttyrý máseleleri talqylandy, bul rette taraptar Qazaqstan mne Germanııa arasyndaǵy senimdi saıası dıalog jáne tabysty saýda-ekonomıkalyq ózara qarym-qatynastyń ornatylǵanyn aıtty. N. Annen jaqynda Astanaǵa jasaǵan jumys sapary qorytyndysyn joǵary baǵalady. Sapar barysynda ol QR Syrtqy ister mınıstri Qaırat Ábdirahmanov jáne QR Prezıdentiniń kómekshisi Nurlan Onjanovpen ekonomıka men saıasat salasyndaǵy mańyzdy taqyryptar jóninde kelissózder júrgizdi.

Qazaqstandyq dıplomat óz kezeginde N. Annen myrzany bir apta buryn nemis astanasynda ótken Qazaqstan-German iskerlik keńesi otyrysynyń tabysty nátıjeleri týraly habardar etti. R. Vasılenkonyń aıtýynsha, jasyl ekonomıka, tsıfrlandyrý jáne aýyl sharýashylyǵy óndirisi salalarynda seriktes bolyp tabylatyn Qazaqstan men Germanııa úshin qarjy salasynda, sonyń ishinde «Astana» Halyqaralyq qarjy ortalyǵymen ózara árekettestik áleýetin belsendi túrde arttyrý tıimdi bolar edi.

Germanııa - Qazaqstannyń iri saýda-ekonomıkalyq seriktesi bolyp tabylady. 2017 jyly ekijaqty saýda aınalymy 4,856 mlrd. eýrony qurap, ótken jylmen salystyrǵanda 21,8 %-ǵa artqandyǵyn kórsetse, aǵymdaǵy jyldyń sońǵy alty aıynda bul kórsetkish 2,885 mlrd. dollardy qurap, ósýdiń jalǵasýyn kórsetedi. 2005-2017 jyldar aralyǵynda nemis kompanııalary Qazaqstanǵa 4,231 mlrd. dollar ınvestıtsııa saldy, onyń 90 % ekonomıkanyń shıkizattyq emes sektoryna baǵyttalǵan.