«Astana» men «BATE» matchynda esep ashyldy
ASTANA. QazAqparat - Eýropa lıgasynyń pleı-off synynda «Astana» men BATE arasyndaǵy qarymta kezdesýde esep ashyldy. Goldy BATE-niń jartylaı qorǵaýshysy Mıxaıl Gordeıchýk oıynnyń 27-mınýtynda saldy.
Aıta keteıik, match Belarýs elinde «Borısov-Arena» stadıonynda ótip jatyr. Birinshi taım eki komandanyń qarqyndy shabýyldarymen bastaldy. Aldymen alań ıeleri sapynan Ivanıchtiń oıynnyń 10-mınýtynda gol soǵatyn múmkindigi boldy. Alaıda ol dopty qaqpadan sál qıys tepti.
Kezdesýdiń 14-mınýtynda Patrık Tvýması «astanalyqtardyń» alǵashqy qaýipti soqqysyn jasady. Degenmen BATE qaqpashysy dopqa tosqaýyl bola bildi. Osydan soń qazaqstandyq klýb qorǵanysqa kóp mán berip, óz oıyn alańynda tas-túıin bekinip aldy.
Biraq Mıxaıl Gordeıchýk birinshi taımnyń bel ortasynda «Astana» qaqpasyna gol salyp ketti.
«Astana» men BATE arasynda Eýropa lıgasynyń pleı-off synynda "Astana Arenada» ótken alǵashqy match 2:0 esebimen qazaqstandyq komandanyń basymdyǵymen aıaqtalǵan bolatyn. Ol kezde «Astana» shabýylshysy Djýnıor Kabananga men Azat Nurǵalıev gol avtorlary atanǵan edi.
