Astana men Atyraý respýblıkalyq bıýdjetke aýdarymyn azaıtty

ASTANA. KAZINFORM – Qarjy mınıstri statıstıkalyq bıýlletenine sensek, 2025 jyldyń 11 aıynda úsh donor oblys respýblıka bıýdjetine byltyrǵy 12 aıdyń kórsetkishinen 5,2 mlrd teńge artyq aqsha aýdarǵan.

2025 jyldyń 11 aıynda jergilikti bıýdjetterden respýblıka bıýdjetine 474 mlrd 662,7 mln teńge alynǵan. Al 2024 jyldyń 12 aıynda bul kórsetkish 469 mlrd 501 mln teńge bolǵan edi.

Onyń ishinde Almaty qalasy – 244 mlrd 816,6 mln teńge, (2024 j – 226 mlrd 102,1 mln teńge), Astana qalasy – 66 mlrd 377,7 mln teńge (74 mlrd 680,1mln teńge), Atyraý oblysy – 163 mlrd 468,4 mln teńge (168 mlrd 718,8 mln teńge) bergen. Osylaısha Astana qalasy respýblıkalyq bıýdjetke byltyrǵa qaraǵanda 8,3 mlrd teńge, Atyraý oblysy 5,3 mlrd teńge kem aýdarsa, Almaty qalasy 18,7 mlrd teńge kóp aýdarǵan.

Taǵy bir donor óńir sanalatyn Mańǵystaý oblysy 11 aıda respýblıkalyq bıýdjetke bir teńge de aýdarmaǵan. Kerisinshe 147 mlrd 14,7 mln teńge sýbventsııa alǵan. Respýblıkalyq bıýdjetke qol jaıǵan óńirlerdiń kóshin Túrkistan oblysy bastap tur – 1 trln 31 mlrd 373,2 mln teńge. Úshtikti Qyzylorda (455 mlrd 736,5 mln teńge) jáne Jambyl (430 mlrd 205,9 mln teńge) oblystary túıindep tur.

Al eń az sýbventsııa alǵan óńir – Ulytaý oblysy (52 mlrd 640,7 mln teńge).

Eske salsaq, Úkimet 2026 jyly Astana, Almaty qalalary men Atyraý oblysynan respýblıkalyq bıýdjetke 879 mlrd 947 mln 69 myń teńge alýdy josparlap otyr.

Premer-mınıstrdiń orynbasary – Ulttyq ekonomıka mınıstri Serik Jumanǵarın keleshekte respýblıkalyq bıýdjetke qarjy aýdaratyn donor óńirlerdiń qataryn Almaty, Shyǵys Qazaqstan, Aqtóbe oblystary tolyqtyrýy múmkin ekenin aıtqan edi.