Astana men Ankara jańa óńirlik tártiptiń avtoryna aınalyp keledi - túrik sarapshysy
ASTANA. KAZINFORM – Qazaqstan Prezıdenti Qasym-Jomart Toqaevtyń Túrkııaǵa sapary tek protokoldyq dıplomatııa aıasymen shektelmeı, Eýrazııadaǵy jańa geosaıası arhıtektýranyń qalyptasýyna yqpal etetin mańyzdy qadam retinde baǵalanyp otyr. Bul týraly Kazinform tilshisine bergen suhbatynda Ankara ýnıversıtetiniń rektory, professor Súleıman Kyzyltoprak málimdedi.
Memleket basshysy Túrkııaǵa sapary barysynda Antalııa dıplomatııalyq forýmy aıasynda ótken «Bolashaqty jobalaý: belgisizdikterdi basqarý» paneldik sessııasyna qatysyp, birqatar elderdiń ókilderimen geosaıası jáne ekonomıkalyq máselelerdi talqylady.
Sarapshynyń aıtýynsha, bul sapardy tek dostas elder arasyndaǵy kezdesý retinde emes, Eýrazııadaǵy kúshter teńgeriminiń jańa úlgisin qalyptastyrý úderisiniń bir bóligi retinde qarastyrý qajet.
– Biz jaı ǵana dıplomatııalyq jaqyndasýdy emes, strategııalyq oılaýdyń úndesýin kórip otyrmyz. Qazaqstan men Túrkııa burynnan geografııalyq turǵyda kópir qyzmetin atqarǵan elder bolsa, búginde bul ról sanaly saıası tańdaýǵa aınalyp otyr. Bul – kezdeısoqtyq emes, uzaqmerzimdi pragmatıkalyq strategııanyń nátıjesi, – dedi Súleıman Kyzyltoprak.
Onyń pikirinshe, sapardyń mańyzdylyǵy ony qorshaǵan geosaıası kontekstpen de baılanysty.
– Antalııa dıplomatııalyq forýmy tek pikir almasý alańy emes, dástúrli odaqtardan tys jańa ózara is-qımyl formattary qalyptasatyn keńistikke aınaldy. Dál osy jerde Qazaqstan men Túrkııa ıkemdi saıasat ustanyp, daıyn bloktarǵa qosylýdan góri óz kún tártibin qalyptastyrýǵa umtylyp otyrǵanyn kórsetýde, – dep atap ótti ol.
Professor qazirgi tańda Eýrazııada jańa yqpaldastyq osi qalyptasyp kele jatqanyn aıtty.
– Áńgime klassıkalyq odaq týraly emes, ıkemdi seriktestik júıesi týraly bolyp otyr. Munda memleketter óz derbestigin saqtaı otyryp, bir-birin tolyqtyrady jáne kúsheıtedi. Qazaqstan men Túrkııa osy úderiste jańa óńirlik tártiptiń teń avtoryna aınalyp keledi, – dedi sarapshy.
Sóz sońynda ol mundaı saparlardyń uzaqmerzimdi áserine nazar aýdardy.
– Mundaı kezdesýler birden nátıje bermeýi múmkin, alaıda dál osyndaı qadamdar ýaqyt óte kele tarıhı ózgeristerdiń negizin qalaıdy. Antalııadaǵy kezdesý – keıin transformatsııalyq yqpal etýi múmkin mańyzdy kezeńderdiń biri. Bul – álemdegi ózgeristerge jaı ǵana jaýap berý emes, ony birlesip qaıta oılap, qalyptastyrýǵa umtylys, – dep túıindedi Súleıman Kyzyltoprak.
