Astana men Almatynyń kósheleriniń birin qazaq dıplomaty N. Tóreqululynyń esimimen ataý usynylmaq
ASTANA. 7 maýsym. QazAqparat - Búgin QR Syrtqy ister mınıstrliginde kórnekti qazaq dıplomaty Názir Tóreqululynyń 120 jyldyǵyna arnalǵan halyqaralyq ǵylymı-tájirıbelik konferentsııa ótýde.
Eki sessııadan turatyn konferentsııa barysynda qatysýshylardyń usynystary qarar retinde qabyldanbaq. Qarar jobasynda Astana men Almaty qalalaryndaǵy kóshelerge Názir Tórequluly esimin berý, qazaq dıplomatııasy jaıynda derekti fılm túsirý, Qazaqstannyń birqatar JOO-larynda qazaq dıplomatynyń murasyn tereń zertteıtin ǵylymı ortalyqtar ashý, osy baǵytta zertteý júrgizip júrgen stýdentter men magıstranttarǵa shákirtaqy taǵaıyndaý syndy birqatar usynystar engizilgen.
«Búgingi konferentsııanyń tanymdyq, akademııalyq mańyzymen birge, úlken rýhanı mańyzy bar. Biz bedeldi jerlesimiz, talantty dıplomat, qazaq dıplomatııasynyń bastaýynda turǵan ardaqty adamnyń rýhyna taǵzym etip otyrmyz. Názir Tóreqululynyń ómiri men shyǵarmashylyǵy Qazaqstannyń qazirgi jáne bolashaq dıplomattary úshin árqashan úlgi bolyp qalmaq. Ol buryńǵy KSRO memleketiniń alǵashqy elshileriniń kóshinde bolǵan asa bilimdar, dańǵyl azamat boldy», - dedi Syrtqy ister mınıstri konferentsııa barysynda.
«Názir Tóreqululynyń maqalalary men eńbekteri asa joǵary tanymdyq mazmunymen qatar, tereń taldaý jáne tamasha stılimen erekshelenetin. Saýd Arabııasynda uzaq 8 jyl boıy elshilik etken tusynda onyń biregeı talanty buryn-sońdy bolmaǵan deńgeıde ashyldy. Onyń eńbekteri, RF muraǵattaryndaǵy qujattary budan ári tereńirek zertteletin bolady», - dep túıdi sózin E.Ydyrysov.
Qaıratker ǵalym retinde otandyq til bilimi salasyna úlken úles qosty. Onyń «Jat sózder», «Ult máselesi jáne mektep», «Qazaq-qyrǵyz úshin jańa álipbı» syndy eńbekteri men ózge de maqalalarynda emle, álipbı, termınologııa júıesi ǵylymı negizde taldanyp otyrady. Sondaı-aq qalamgerdiń ádebıet týraly pikirleri de erekshe. Ol S.Seıfýllınniń «Asaý tulpar», «Baqyt jolyna» atty shyǵarmalaryna, ózbek kalamgeri A. Qadyrıdiń eńbekterine syn jazdy. Ózbektiń «Inqılob» atty jýrnalyna jazǵan ıslam dini, jádıtshildik, Túrkistan tarıhy týraly maqalalary ǵylymı naqtylyǵymen kózge túsedi. Qaıratker 1937 jyly 15 shildede ustalyp, 3 qarashada atyldy.
