Astana men Almatynyń áleýmettik nysandaryna ataý berý respýblıkalyq dárejede sheshiledi
ASTANA. 22 qańtar. QazAqparat - Astana men Almatynyń áleýmettik nysandaryna ataý berý respýblıkalyq dárejede sheshiletin bolady, dep habarlandy astana.kz. saıtynan.
Memleket basshysy N.Nazarbaev «Onomastıka máseleleri boıynsha Qazaqstan Respýblıkasynyń keıbir zań aktilerine ózgerister men tolyqtyrýlar engizý týraly» Zańǵa qol qoıdy. Túzetýlerge sáıkes endi áleýmettik nysandarǵa ataý berý máselesi respýblıkalyq dárejede sheshiletin bolady.
«Budan bylaı respýblıkalyq mańyzy bar qalalardaǵy kóshelerge, alańdarǵa, mektepterge, balabaqshalar men basqa da áleýmettik nysandarǵa ataý berýdi respýblıkalyq onomastıkalyq komıssııa bekitetin bolady», - dep málimdedi Astana qalasy Tilderdi damytý basqarmasynyń bastyǵy Erbol Tileshov.
Zańǵa engizilgen ózgerister onomastıkalyq qyzmet salasyn jetildire túsýge baǵyttalǵan. Basqarma bastyǵynyń aıtýynsha, keıingi jyldary jergilikti jerlerde áleýmettik nysandarǵa kópshilikke beımálim adamdardyń esimi berilip ketetin jaǵdaılar jıi kezdesken kórinedi.
«Sońǵy 20 jyl kóleminde bul týraly BAQ-ta az jazylǵan joq. Kóshelerge, mektepter men basqa da áleýmettik mańyzdy nysandarǵa aımaqtyq deńgeıdegi partııa, keńes qyzmetterinde istegen, eńbekteri respýblıkaǵa keńinen jete tanylmaǵan jandardyń esimderi berilip keldi. Endi budan bylaı oǵan toqtaý qoıyldy», - dedi ol.
