Astana men Almatyda túngi kólik jarystary jıi oryn alady
ASTANA. QazAqparat - Astana men Almatyda túngi kólik jarystary jıi oryn alady. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Avtomotosport federatsııasynyń prezıdenti Marat Ábiqaev aıtty.
«Ókinishke oraı strıtreıserlerdiń (túngi qaladaǵy kólik jarystary) basym bóligi Almaty men Astana qalalarynda oryn alady. Ol balalardyń deni sportshylar emes. Biz olardy sport alańdary joldaryna tartý úshin jumystar júrgizip jatyrmyz. Óıtkeni, olar sporttyq sharalarǵa qatysatyn bolsa, onda osy ýaqytqa deıin aınalysqan tirlikterin toqtatady. Buǵan qosa, sport alańdaryna ózderiniń dostaryn tartatyn bolady. Ókinishke oraı olardy ózińe tartýdan ózge yqpal etý tetigi joq. Sondyqtan munymen quqyq qorǵaý organdar aınalysady jáne biz olarmen tyǵyz jumys isteýge tyrysamyz», - dedi ol.
BUU jol qaýipsizdigin qamtamasyz etý jónindegi arnaýly ókili Jan Todt ta strıtreıser jaıyna toqtalyp, bul máseleni Astana men Almaty ákimderimen jáne Úkimet múshelerimen jan-jaqty talqylaǵandyǵyn atap ótti.
«Árıne, túngi kólik jarysy tek Astana men Almatyda ǵana emes búkil álemde oryn alady. Bul kólik júrgizýdiń óte qaýipti túri. Kólik júrgizýdiń arnaıy talaptary men erejeleri bolýy tıis. Munan bólek, olardyń kólikpen óte joǵary jyldamdyqta jarysýlaryna múmkindik beretin arnaıy jabdyqtalǵan oryndardyń da bolǵany jón», - dedi J.Todt.
