Astana men Almatyda ótetin qysqy Azııada-2011 oıyndaryna Qazaqstannyń halyqaralyq deńgeıdegi joǵarǵy daıyndyǵy bizdi tánti etip otyr - Saýd Arabııasy
ASTANA. 24 qańtar. QazAqparat - «Astana men Almatyda ótetin qysqy Azııada-2011 oıyndaryna Qazaqstannyń halyqaralyq deńgeıdegi joǵarǵy daıyndyǵy bizdi tánti etip otyr», dep málim etti Saýd Arabııasy Koroldiginiń Jastar isi jáne sport agenttiginiń tóraǵasy ámir Naýaf ben Feısal ben Fahd ben Abdel Ázız Qazaqstannyń Elshisi Qaırat Lama Sharıfpen bolǵan kezdesýde.
Bul týraly Qazaqstannyń Saýdııadaǵy elshiliginiń baspasóz qyzmetinen habarlady.
«Qazaqstan óziniń Islam Konferentsııasy Uıymyna tóraǵalyǵy barysynda Aq olımpıadany Azııa qurylyǵynda musylman elderi arasynan alǵashqy bolyp ótkizip otyr» - dep atap ótti, saýd bekzadasy óz sózinde.
Elshi Qaırat Lama Sharıf óz kezeginde Qazaqstannyń Azııalyq olımpıadalyq keńestiń shtab-páteri ornalasqan Kýveıtte kontınentaldyq oıyndar alaýynyń tutaný dástúrin birinshi bolyp qalaǵanyn jáne qazirgi ýaqytta alaý estafetasy elimizdiń barlyq aımaqtarynda ótip jatqandyǵyn habarlady.
Saýd Arabııasynyń burynǵy Koroli Fahdtyń nemeresi ámir Naýaf olımpıada oıyndarynan keıingi merzimde Qazaqstandaǵy «Medeý» muz aıdynyn, «Shymbulaq» taý shańǵysy men Almatydaǵy Halyqaralyq shańǵy tramplın keshenderin jáne basqa da sporttyq nysandardy qysqy sport túrleri boıynsha saýd sportshylaryn daıyndaý úshin qoldanýǵa qyzyǵýshylyq bildirdi. Osyǵan baılanysty taraptar Sport salasyndaǵy yntymaqtastyq týraly úkimetaralyq kelisimdi daıyndap, qol qoıýǵa ýaǵdalasty.
