Astana men Almatyda «Operalııa - 2014» festıvali ótedi
ASTANA. QazAqparat - 1 jáne 4 shilde kúnderi Astana jáne Almaty qalalarynda opera ánshileriniń eń tanymal festıvali «Operalııa - 2014» ótedi.
«Operalııa» halyqaralyq festıvali 2005 jyldan bastap Astana kúni qarsańynda ótkiziletin eń úlken mádenı sharalardyń birine aınaldy.
«Operalııa» festıvalinde qala qonaqtary men turǵyndary ár jyly álemniń úzdik teatrlaryndaǵy kórnekti balet pen opera juldyzdarynyń ónerin tamashalaýǵa múmkindik alady. Bıylǵy jylǵy festıvalge joǵary deńgeıdegi juldyzdar qatysady.
Kontserttik baǵdarlamada Eýropanyń úzdik teatrlarynyń solısteri: Leonardo Kaımı (tenor), Eva Meı (soprano) óner kórsetedi. Dırıjeri - Alan Bóribaev.
«Operalııa-2014» festıvalinde «Jas Brazılııa baleti» balettik trýppasynyń solısteri Amanda Gomes jáne Markýs da Sılva, Ulttyq Rım operasynyń solısteri Erıka Gaýdenzı men Djakomo Lıýsı, Shtýtgart Ulttyq operasynyń prıma balerınasy Alısııa Amatrıan jáne Shtýtgart Ulttyq operasynyń premeri Djeıson Reılı, Marıındik teatr solısteri Elena Evseeva jáne Alekseı Popov (Reseı), «Astana Opera» Memlekettik opera jáne balet teatrynyń solısteri Taır Gataýov, Áıgerim Beketaeva jáne Erkin Rahmetýllaev, Abaı atyndaǵy QMAOBT solısteri Gúlmıra Qurbanova jáne Farhad Býrıev, sondaı-aq Abaı atyndaǵy qazaq memlekettik akademııalyq opera jáne balet teatrynyń sımfonııalyq orkestri jáne hory óner kórsetedi, dep habarlaıdy «Qazaq áýenderi» AQ-nyń baspasóz qyzmeti.
