Astana men Almatyda eski tehnıkany ótkizip, jańa tońazytqysh alýǵa bolady
ASTANA. QazAqparat - Astana men Almatyda eski elektro-turmystyq tehnıkalardy qabyldap, energııa únemdeıtin jańa tońazytqyshqa jeńildik berý naýqany bastaldy, dep habarlaıdy QazAqparat tilshisi.
Atalǵan naýqandy BUU Damý baǵdarlamasy Qazaqstandaǵy energııa tutyný kólemin azaıtý maqsatynda uıymdastyryp otyr. Munda eski nemese isten shyqqan tońazytqysh, elektr plıtasy syndy turmystyq tehnıkany ótkizgen turǵyndarǵa energııa únemdeıtin jańa tońazytqyshqa 16 500 teńge jeńildik kýpony beriledi.
«Qazaqstanda elektr energııasyn tutyný kólemi jyldan-jylǵa artyp keledi. Elimizdegi elektr energııasynyń qurylymy kóp jaǵdaıda kómirge, qazbaly otyn túrlerine negizdeledi jáne sáıkesinshe atmosferaǵa parnıktik gazdar kóp bólinedi. BUU Damý baǵdarlamasy aıasynda biz energııa únemdeýge jáne energetıkalyq tıimdilikke erekshe kóńil bólemiz. Sondaı-aq, energetıkalyq turǵyda tıimdi ónimderdi qoldanýdy nasıhattaımyz. Taldaý júrgizý arqyly turmystyq qurylǵylar arasynda eń kóp energııany tońazytqysh qajet etetinin anyqtadyq. Jalpy somasy 33 mln teńgege 2 myń kýpon ázirlep otyrmyz», - deıdi Qazaqstandaǵy BUU Damý baǵdarlamasy Turaqty damý jáne ýrbanızatsııa departamentiniń basshysy Ramazan Jampeıisov.
Óz kezeginde QR IDM Indýstrııalyq damý jáne ónerkásiptik qaýipsizdik komıtetiniń basqarma basshysy Jaqsylyq Toqaev energetıkalyq tıimdi turmystyq qurylǵylardy satyp alýdy nasıhattaý qajettigin jetkizdi.
«Bir tońazytqysh jylyna 400 kılovatt qýatty tutynady. Sońǵy jyldary shyǵarylǵan tońazytqyshtardyń energetıkalyq tıimdiligi artyp keledi. Buryndary A sanaty bolsa, qazir A+, A2+ shyǵaryldy, bolashaqta A4+ úlgisi de paıda bolýy múmkin. Memleket basshysy energııany únemdeý, energetıkalyq turǵyda tıimdi qurylǵylardy satyp alýdy nasıhattaý jóninde tapsyrmalar berdi. BUU Damý baǵdarlamasymen birlesken jobamyz da osyǵan baǵyttalǵan», - dedi J. Toqaev.
Aıta keteıik, jeńildik kýpony arqyly jańa tońazytqyshty «Mechta» jáne «Tehnodom» dúkenderinen alýǵa bolady. Naýqan 2018 jyldyń 1 qazanynan 1 jeltoqsanǵa deıin jalǵasady. Eski turmystyq tehnıkalardy mamandar tegin alyp ketedi. Ol úshin Astanada - 8 (7172) 64-25-33 nómirine, Almatyda - 8 (7273) 11-54-52 nómirine habarlasý kerek.
