Astana men Almatyda biryńǵaı kezekshilik-dıspetcherlik qyzmet ortalyǵy qurylady
ASTANA. QazAqparat - Aldaǵy eki jylda Astana men Almaty qalalarynda biryńǵaı kezekshilik-dıspetcherlik qyzmet ortalyǵyn qurý qarastyrylady.
Bul týraly búgin Májilistiń Ekologııa jáne tabıǵatty paıdalaný komıtetiniń keńeıtilgen otyrysynda Іshki ister mınıstriniń orynbasary Vladımır Bojko málim etti. Eske sala keteıik, komıtet otyrysynda Tótenshe jaǵdaılardyń aldyn alý men joıýdyń korporatıvtik aqparattyq-kommýnıkatsııalyq júıesin qurý baǵdaralmasy talqylanǵan bolatyn.
«Osy saladaǵy mańyzdy bıýdjettik baǵdarlama - «112 biryńǵaı kezekshilik-dıspetcherlik qyzmetin qurý» bolyp otyr. Tótenshe jaǵdaılarǵa jedel den qoıýda jedel qyzmettiń kezekshilik jáne dıspetcherlik organdary mańyzdy ról atqarady. Qazirgi tańda bizdiń elimizde ár túrli vedomstvolardyń shuǵyl jáne kommýnaldyq qyzmetterin biriktiretin biryńǵaı aqparttyq ortalyq joq. Al «112» biryńǵaı kezekshilik-dıspetcherlik qyzmetin qurý osy saladaǵy problemalardy sheship, Qazaqstanǵa Eýropalyq Odaq pen AQSh-ta qoldanylatyn «112 qutqarý qyzmeti» sekildi qyzmet túrin engizýge septigin tıgizedi», - dedi V. Bojko. Onyń aıtýynsha, ilki joba boıynsha ortaq algorıtm negizinde barlyq shuǵyl qyzmetterdiń kelisilgen ózara baılanysy joǵary deńgeıge kóterilip, halyqty qorǵaýǵa baǵyttalǵan keshendi sharalar uıymdastyrý qarastyrlady.
«Sonymen qatar, Astana jáne Almaty qalalarynda eki jyldyń ishinde biryńǵaı keezkshilik-dıspetcherlik qyzmet ortalyqtaryn engizý qarastyrylady. Jalpy, jobany júzege asyrýdyń alǵashqy satysynda 2013 jyly bıýdjetten 1 mlrd. 190 mıllıon teńge bólinse, qalǵan 239 mıllıon teńgesi 2014 jylǵa qarastyrylǵan. Jobanyń jalpy quny 1 mıllıard 430 mıllıon teńgeni qurap otyr», - deıdi Іshki ister mınıstriniń orynbasary.
