Astana men Almatyda 10 myń jáne 20 myń oryndyq stýdenttik qalashyqtar salynatyn boldy

Bul týraly búgin selektorlyq rejımde ótken Úkimet otyrysynan soń jýrnalısterge suhbat bergen Bilim jáne ǵylym mınıstri Baqytjan Jumaǵulov málim etti.

«Biz búgin Memleket basshysy aldyǵa qoıǵan mindetterdi júzege asyrý úshin bolashaqta elordada 10 myń oryndyq, al Almatyda 20 myń oryndyq stýdenttik qalashyq salý jónindegi jobany daıyndaýdamyz. Jalpy elimizdiń aımaqtarynda 14-16 myń jataqhana boı kóteretin bolady. Stýdentterdiń baspanalaryna barlyǵy 34 mıllıard teńge qajet. Sonymen qatar mınıstrlik jóndeý men qaıta jańartýǵa jatatyn jataqhanalardyń tizimin jasaýda. Buǵan qosa jeke joǵary oqý oryndarynyń basshylaryna stýdentterdi baspanamen qamtamasyz etý jóninde tapsyrma berildi»,-dedi mınıstr.

Onyń aıtýynsha, stýdentterdi aldaǵy 5 jyldyń ishinde 100 paıyz baspanamen qamtamasyz etý múmkin emes. «Eger biz baspana máselesin 75-80 paıyzǵa sheshetin bolsaq, álemdik deńgeıde alǵanda da bul jaqsy kórsetkish bolady. Al ázirge elimizdiń stýdentteri 30-35 paıyzǵa ǵana baspanamen qamtamasyz etilip otyr»,-dedi B.Jumaǵulov.