Astana men Almaty reseılik týrıster úshin tanymal qalalar bestigine endi
ASTANA. QazAqparat - Qazaqstannyń eki qalasy Astana men Almaty TýrStat saraptamalyq agenttiginiń 2017 kúzdegi saıahattaýǵa qolaıly TMD qalalarynyń ishinde reseılik týrısterge tanymal ondyqtyń alǵashqy bestigine endi, dep habarlaıdy QazAqparat.
2017 jyldyń kúzindegi týrısterge tanymal TMD qalalary: 1) Mınsk (Belarýs); 2) Astana (Qazaqstan); 3) Baký (Ázerbaıjan); 4) Erevan (Armenııa); 5) Almaty (Qazaqstan); 6) Tashkent (Ózbekstan); 7) Ashhabad (Túrikmenstan); 8) Kıev (Ýkraına); 9) Kıshınev (Moldova); 10) Bishkek (Qyrǵyzstan), - dep jazady Qazaqstannyń RF-daǵy elshiliginiń saıty .
«Bul reıtıng týrısterdi ornalastyrý quraldarynyń onlaın-tirkeý júıesiniń málimetterine saraptama jasaý nátıjesi boıynsha qurastyryldy», - degen resmı málimdemede.
TýrStat málimetterine sáıkes, týrıster Mınsk qalasyna kúz mezgilinde orta eseppen alǵanda 2,5 kúnge kelip, jatar orynǵa táýligine 70 dollar jumsaıdy.
Týrıster úshin TMD kólemindegi eń arzan qalalar - Bishkek pen Kıshınev bolsa, eń qymbaty - Astana men Baký.
«Orta eseppen alǵanda Astanaǵa 2 kún, táýligine 85 dollar, Baký - 3 kún, táýligine 78 dollar, Erevan - 3 kún, táýligine 67 dollar, Almaty - 3,5 kún, táýligine 65 dollar, Tashkent - 2 kún, táýligine 43 dollar, Ashhabad - 3 kún, táýligine 40 dollar, Kıev - 2 kún, táýligine 56 dollar, Kıshınev - 1 kún, táýligine 35 dollar, Bishkek - 1 kún, táýligine 32 dollar», - dep kórsetti agenttik.
