Astana men Almaty ICCA reıtınginde TOP-5 týrıstik qala qataryna endi

ASTANA. QazAqparat – Qazaqstan TMD elderi arasynda iskerlik týrızm kóshbasshylarynyń biri atandy. Eki birdeı halyqaralyq uıymnyń ókilderi elimizge kelip, ishki týrızmniń jaı-kúıimen tanysty, dep habarlaıdy QazAqparat Kazakh Tourism ulttyq kompanııasynyń baspasóz qyzmetine silteme jasap.

Eýropa boıynsha halyqaralyq kongrester men konferentsııalar qaýymdastyǵynyń (ICCA) óńirlik menedjeri Efı Kýdelı jáne IMEX Frankfurt halyqaralyq kórmesiniń ókili Lız Brand bastaǵan halyqaralyq is-sharalardy uıymdastyrýshylar men BAQ ókilderi Astana jáne Almaty qalalaryna saparmen keldi.

Delegatsııa qazaqstandyq seriktestermen jáne týrıstik bıznes ókilderimen yntymaqtastyq jáne halyqaralyq is-sharalardy ótkizý boıynsha kezdesý ótkizdi. Kezdesýge qonaq úı ókilderi, is-sharalar ótkizetin alańdardy basqarýshy kompanııalardyń basshylary men týroperatorlar qatysty.

ICCA talaptaryna sáıkes, reıtıngige ený úshin jylyna kem degende 3 halyqaralyq deńgeıdegi ótkizý kerek. Sonymen qatar, uıymdastyrylǵan is-sharalarǵa joq degende 50 halyqaralyq delegatsııa qatysýy mindetti.

Atalǵan qaýymdastyqtyń statıstıkasyna sáıkes, 2013-2022 jyldar aralyǵynda Qazaqstanda tamyz-qazan aıy aralyǵynda 50-den 500-ge deıin delegatsııanyń qatysýymen is-shara ótti.

«Eýropa boıynsha óńirlik menedjer retinde, bul – meniń alǵashqy saparym. Sapar barysynda týrıstik qoǵamdastyq ókilderimen tanysyp, Ortalyq Azııada halyqaralyq is-sharalardy ótkizýde kóshbasshy qalalardyń biri sanalatyn Astana men Almatynyń iskerlik týrıstik ınfraqurylymymen tanysqanyma qýanyshtymyn», - deıdi Eýropa boıynsha halyqaralyq kongrester men konferentsııalar qaýymdastyǵynyń (ICCA) óńirlik menedjeri Efı Kýdelı.

ICCA-nyń ótken jylǵy elder men qalalar reıtıngisinde Qazaqstan Grýzııa men Ázirbaıjannan keıin úshinshi orynda ornalasqan. Al, ótkizilgen halyqaralyq is-sharalar sany boıynsha óńirdiń bes eli arasynda úshinshi orynda tur (Almaty – úshinshi qala, Astana – besinshi).

2019 jyly MICE ındýstrııasy elimizge 1 trln AQSh dollar ınvestıtsııa ákeldi, 10 mln jumys ornyn quryp, 1,5 mlrd-qa jýyq týrıst jınady. Bul iskerlik týrızm ádettegi jeke týrızmge qaraǵanda 3 ese kóp paıda ákeletinin kórsetedi. MICE qoldaý baǵdarlamasyn turaqty qarjylandyrý jaǵdaıynda Qazaqstannyń óńirde iskerlik týrızmdi ilgeriletýde kóshbasshy bolýǵa barlyq múmkindigi bar.

Aıta keteıik, MICE ındýstrııasy – ártúrli korporatıvtik jáne iskerlik is-sharalardy uıymdastyrýmen jáne ótkizýmen baılanysty iskerlik týrızm ındýstrııasynyń salasy.

ICCA (International Congress and Convention Association) – halyqaralyq kongresster men konferentsııalar qaýymdastyǵy, bul – halyqaralyq qaýymdastyqtardyń kezdesý ındýstrııasy úshin jahandyq qaýymdastyq jáne bilim ortalyǵy.