Astana men Almaty deklaratsııalarynyń aıyrmashylyǵy nede - Eljan Birtanov

  ASTANA. QazAqparat - Osydan 40 jyl buryn qabyldanǵan Almaty deklaratsııasy men búgin elordada qabyldanǵan Astana deklaratsııasynyń aıyrmashylyǵy nede? Medıtsınalyq-sanıtarlyq alǵashqy kómek boıynsha jańa deklaratsııa qandaı ózgeristerdi eskerip otyr? Bul suraqqa Elordada ótip jatqan medıtsınalyq-sanıtarlyq alǵashqy kómek jónindegi jahandyq konferentsııa barysynda QR Densaýlyq saqtaý mınıstri Eljan Birtanov jaýap berdi, dep habarlaıdy QazAqparat tilshisi.

«Qysqasha aıtqanda, Astana deklaratsııasy ýaqyttyń talaby men Almaty deklaratsııasynan beri qabyldanǵan saıası qujattardy esepke alady. Eń aldymen, Astana deklaratsııasy - BUU-nyń turaqty damýynyń maqsaty. Ekinshiden, jańa deklaratsııa adamı kapıtaldy damytýda, tsıfrly tehnologııalardy qoldanýda Úkimetterden qosymsha kúsh-jiger jumsaýdy suraıdy. Demek, Astana deklaratsııasy 40 jyldan bergi ǵylymı-tehnıkalyq progresti esepke alyp otyr. Úshinshiden, bul qujat óziniń júzege asyrylýy jolynda qol qoıǵan memleketterge talapty kúsheıtýdi usynady. Sebebi, búgin aıtylyp jatqandaı keıbir elder osydan 40 jyl buryn qabyldanǵan Almaty deklaratsııasynyń qaǵıdattaryn iske asyryp úlgermegen. Osyǵan baılanysty, deklaratsııany qoldaǵan múshe-memleketter, DDSU, ıÝNISEF osy deklaratsııanyń qaǵıdattarynyń oryndalýyna ún qosady», - deıdi Eljan Birtanov.

Eske sala ketsek, Eljan Birtanov dál osy konferentsııada Astana deklaratsııasynyń qalaı qabyldanǵanyn aıtyp bergen edi.

Buǵan deıin Dúnıejúzilik densaýlyq saqtaý uıymyna múshe barlyq 197 memleket medıtsınalyq-sanıtarlyq alǵashqy kómek boıynsha Astana deklaratsııasyn biraýyzdan qabyldaǵanyn habarlaǵan bolatynbyz.

Sondaı-aq, Memleket basshysy Nursultan Nazarbaev medıtsınalyq-sanıtarlyq alǵashqy kómek boıynsha jańa Astana deklaratsııasyn qabyldaý - búkil álemdegi densaýlyq saqtaý salasy úshin mańyzdy kezeń bolatynyn atap ótken bolatyn.