Astana men Almatydan Goaǵa tikeleı reıs ashylýy múmkin
ALMATY. KAZINFORM – Almatyda halyqaralyq «Týrızm jáne saıahat» kórmesi (KITF 2026) ótip jatyr.
Bıyl kórmege 24 elden 414 kompanııa qatysyp otyr. Olardyń qatarynda Ázerbaıjan, Vetnam, Grýzııa, Mysyr, Úndistan, Italııa, Qytaı, BAÁ, Túrkııa, Ońtústik Koreıa jáne Japonııa bar.
KITF kórmesinde Goa týrızm departamenti aýqymdy pavılon uıymdastyrdy. Almatyǵa arnaıy kelgen Úndistannyń Goa shtatynyń týrızm mınıstri Rohan Khaýn halyqaralyq seriktestikti keńeıtýge, sonyń ishinde Qazaqstanmen yntymaqtastyqqa nazar aýdarylǵanyn atap ótti. Onyń aıtýynsha, qazir osy aımaqqa Qazaqstannan tikeleı áýe reısterin ashý úshin kelissózder júrgizilip jatyr.
– Bizdiń maqsatymyz – Qazaqstannan kelgen týrısterge shtat usynatyn barlyq tájirıbeni kórsetý. Búginde qazaqstandyqtar Air Astana arqyly Mýmbaı men Delıge ushyp kelip, odan ári Goaǵa barady. Biz Almaty men Astanadan Goaǵa FlyArystan jáne SCAT Airlines kompanııalarymen birlesip charterlik reıster ashý boıynsha kelissózder júrgizip jatyrmyz, - dedi ol.
Eske salaıyq, buǵan deıin Almaty men Inchhon arasynda jańa reıs qatynaıtynyn jazǵanbyz.