Astana men Almatyda qazaqstandyqtardyń jeke derekterin zańsyz satqan top ustaldy
ASTANA. KAZINFORM – Bıyl naýryzda UQK prokýratýra organdarynyń úılestirýimen Astana jáne Almaty qalalarynda QR azamattarynyń derbes derekterin zańsyz jınaýda jáne taratýda kúdikti adamdar toby áreketiniń jolyn kesti.
Tergeý materıaldary boıynsha qylmystyq is fıgýranttary zańsyz jolmen alynǵan aqparatty ınternet jelisinde satyp kelgen.
Satyp alýshylar qatarynda mıkroqarjy jáne kollektorlyq uıymdardyń keıbir ókilderi, sondaı-aq jeke tulǵalar bolǵan.
Tintý barysynda kompıýterlik tehnıka, elektrondyq aqparat tasymaldaǵyshtar, iri kólemde aqsha qarajaty jáne ózge de zattaı dáleldemeler tárkilendi.
Qylmystyq kodekstiń 147, 208 jáne 210-baptary boıynsha sotqa deıingi tergep-tekserý júrgizilip jatyr.
Qylmystyq-protsestik kodekstiń 201-babynyń 1-bóligine sáıkes ózge aqparat jarııa etýge jatpaıdy.
Aıta ketelik Úkimet jeke derekterdi qorǵaý talabyn jańartatyn qujatty bekitken edi.
