Astana men Almatyda bet-álpetti taný júıesi iske qosyldy
ASTANA. KAZINFORM - Qazaqstannyń eki qalasynda bet-álpetti taný júıesi jumysyn bastady. Bul týraly ІІM habarlady.
Innovatsııalyq joba Іshki ister mınıstrligi, Ulttyq qaýipsizdik komıteti jáne Tsıfrlyq damý, ınnovatsııalar jáne aeroǵarysh ónerkásibi mınıstrliginiń yntymaqtastyǵymen ázirlengen.
«Ulttyq beınemonıtorıng júıesi jasandy ıntellekt tehnologııalarynyń qoldanylýymen izdeýdegi adamdardy tanýǵa, qoǵamdyq oryndarda qaldyrylǵan zattar týraly sıgnal berýge, quqyq buzýshylyqtardy avtomatty rejımde tirkeýge múmkindik beredi. Sondaı-aq kompıýterlik baǵdarlama kólikti markasy, modeli jáne túsi boıynsha sáıkestendire alady. „Aqyldy“ kameralardyń nazarynda temirjol vokzaldary, áýejaılar, qonaq úıler, kósheler jáne saýda oıyn-saýyq ortalyqtary sııaqty nysandar bar. Júıe óz tıimdiligin kórsetti. Dúnıejúzilik kóshpendiler oıyndaryn ótkizý kezinde elordanyń qoǵamdyq oryndarynda joǵalǵan balalardy, sondaı-aq esepte turǵandar men habar-osharsyz ketken adamdardy jedel tabýǵa múmkindik týdy. Beıne-taldaý júıesiniń kómegimen Astanada izdeýde júrgen 46 quqyq buzýshy jedel túrde anyqtalyp ustaldy. Osyǵan uqsas jumys Almatyda júrgizilip jatyr. Onda osyndaı 30 adam anyqtalyp quryqtaldy», — dedi ІІM.
Engizilgen tehnologııalar — aqyldy qalalardy qurýǵa jasalǵan qadam. Olar qoǵamdyq qaýipsizdik deńgeıin arttyryp, qylmysty azaıtýǵa kómektesedi. Mundaı júıeler Qytaıda, Reseıde jáne Eýropa elderinde belsendi qoldanylady.
«Qazaqstan úzdik tájirıbelerdi ıgerip, osy álemdik úrdistiń bir bóligine aınalýda. Aldaǵy ýaqytta kameralar sanyn ulǵaıta otyryp, beınemonıtorıngti keńeıtý josparlanyp otyr. Bul kezeń-kezeńimen júrgiziletin bolady. Aıta keteıik, búgingi tańda menshik túrine qaramastan elimizde 1 mln 359 myń beınekamera bar, onyń 310 myńy jedel basqarý ortalyqtary jáne polıtsııanyń kezekshi bólimderine shyǵarylǵan. Innovatsııalyq jobalardyń qylmysqa qarsy is-qımylda jáne adamdar kóp jınalatyn jerlerde qoǵamdyq qaýipsizdikti qamtamasyz etýde kómegi zor. Іske qosylǵan júıelerdiń basty maqsaty — árbir azamattyń zań men tártip ornaǵan qoǵamda ózin qaýipsiz sezinýine jaǵdaı jasaý», — delingen mınıstrlik habarlamasynda.