Astana men Almaty kóshelerinde turaqtar tegin bola ma

ASTANA. KAZINFORM — Astana men Almaty qalalarynda aqyly jeke turaqtar júıesi toqtatylýy múmkin. Bul týraly Májilis depýtaty Baqytjan Bazarbek óziniń áleýmettik jelidegi paraqshasynda habarlady. 

— «Qurylys kodeksi» jobasyn qaraý barysynda jumys toby men usynǵan túzetýdi qoldady. ıAǵnı, Jer kodeksiniń 109-babyna engizilgen ózgerister arqyly Astana men Almatydaǵy kóshelerde ornalasqan aqyly turaqtardy alyp tastaımyz, — dep jazdy Baqytjan Bazarbek.

Depýtattyń aıtýynsha, Almaty qalasynda buǵan deıin jeke fırmalar arqyly aqyly turaqtar uıymdastyrylyp, odan túsken qarajat qalanyń emes, deldal kompanııalardyń paıdasyna jumys istegen.

— Infraqurylymǵa eshqandaı ınvestıtsııa salynǵan joq, turaqtarda tártip ornaǵan joq. Tek kúmándi jolmen ıemdenilgen oryndar men sol arqyly baıyǵandar ǵana boldy. Daǵdarys kezinde halyqtyń esebinen tabys tabý — qoǵamǵa qarsy qylmys, — dedi Baqytjan Bazarbek.

Onyń bastamasyn birneshe depýtat qoldaǵan. Qazir túzetý salalyq komıtettiń qaraýynda.

— Men senemin, ádiletsiz aqyly turaq júıesi tolyq joıylady. Bul ádilettiliktiń ornaýyna jasalǵan naqty qadam. Endi dúısenbi kúni salyq komıtetiniń sońǵy sheshimin kútemiz, — dep qorytyndylady depýtat.

Eske salsaq, Astananyń Kólik jáne jol-kólik ınfraqurylymyn damytý basqarmasy «Astana turaq keńistigine» qatysty máseleni sheshý jumystary qaı kezeńde ekenin jáne turaq tarıfine qatysty túsinik bergen edi.

Sonymen qatar elordada aqyly turaqtardy ákimdik qaramaǵyna qaıtarý protsesi qalaı júrgiziletinin jazǵanbyz. 

Sondaı-aq Astanada byltyr aqyly turaq aqysyn tólemegen júrgizýshilerge 2 mlrd teńge aıyppul salynǵany anyqtaldy.