Astana men Almaty áýejaılarynda jalǵan qujatpen shekaradan ótpek bolǵan 19 sheteldik ustaldy
ASTANA. KAZINFORM — Qazaqstanda jalǵan qujattarmen memlekettik shekarany kesip ótýge áreket jasaǵan shetel azamattary anyqtaldy. 2026 jyldyń qyrkúıek jáne qazan aılarynda Astana men Almaty áýejaılarynda osyndaı 19 fakt tirkeldi.
Bul týraly Qazaqstan Respýblıkasy Ulttyq qaýipsizdik komıtetiniń Shekara qyzmeti habarlady.
Quqyq buzýshylardyń basym bóligi jalǵan vızalardy jáne úshinshi tulǵalardyń jeke derekteri kórsetilgen qujat blankilerin paıdalanǵan.
Atalǵan faktiler boıynsha quqyq qorǵaý organdary sotqa deıingi tergep-tekserý júrgizip jatyr.
Jalpy, 2026 jyldyń basynan beri shekaralyq baqylaý kezinde jalǵan jáne bógde qujattardy paıdalanýǵa qatysty 358 quqyq buzýshylyqtyń joly kesilgen.
UQK Shekara qyzmeti memlekettik shekarany jalǵan nemese basqa adamnyń qujattaryn paıdalanyp kesip ótý qylmystyq jaýaptylyqqa ákep soǵatynyn eskertti.
Eske salaıyq, buǵan deıin Qazaqstan shekarasyn Kaspıı arqyly zańsyz kesip ótken úsh ırandyq sottalǵanyn habarlaǵan edik.
