Astana men Almaty áýejaılarynda maımyl sheshegi ınfektsııasyna qarsy oqý-jattyǵý ótti
ASTANA. KAZINFORM – QR Densaýlyq saqtaý mınıstrliginiń sanıtarııalyq-epıdemıologııalyq qyzmeti Astana jáne Almaty halyqaralyq áýejaılarynda maımyl sheshegi sııaqty karantındik jáne asa qaýipti ınfektsııa belgileri bar adamdardy anyqtaýdy qosa alǵanda, qoǵamdyq densaýlyq saqtaý salasyndaǵy tótenshe jaǵdaılarǵa den qoıýǵa daıyndyq boıynsha oqý-jattyǵýlar ótkizdi.
«Oqý-jattyǵýlar barlyq negizgi qyzmetterdiń: sanıtarııalyq-epıdemıologııalyq, shekaralyq, kedendik, sondaı-aq áýejaı, jelilik polıtsııa bólimi, áýejaıdyń medıtsınalyq pýnkti, jedel medıtsınalyq kómek jáne medıtsınalyq uıymdardyń ózara is-qımylyn pysyqtaýǵa baǵyttalǵan», — delingen habarlamada.
Infektsııalyq aýrýlarǵa kúdikti jolaýshylar anyqtalǵan kezde is-qımyldy úılestirýge erekshe nazar aýdarylady.
Oqý-jattyǵý barysynda shartty túrdegi maımyl sheshegi aýrýy tartyldy. Personal jolaýshydan aýrý belgilerin anyqtaýdan bastap ony aýrýhanaǵa jatqyzýǵa jáne qajetti epıdemııaǵa qarsy jáne dezınfektsııalyq sharalardy júrgizýge deıingi is-sharalardyń tolyq tsıklinen ótti.
Jattyǵý kezinde barlyq qyzmetter is-qımyldyń joǵary dárejedegi daıyndyǵy men úılesimdiligin kórsetti, bul olardyń yqtımal qaýipterge den qoıýǵa daıyn ekendigin rastaıdy.
Oqý-jattyǵý qorytyndysy boıynsha semınar-keńes ótkizildi, onda ár qyzmettiń is-qımyly talqylanyp, vedomstvoaralyq ózara is-qımyldy kúsheıtý boıynsha usynystar berildi.
