Astana men Almaty áýejaıy Ortalyq Azııa men TMD boıynsha úzdik atandy
ASTANA. KAZINFORM – Astana men Almaty áýejaılary Skytrax World Airport Awards 2025 nusqasy boıynsha Ortalyq Azııa men TMD-daǵy úzdik dep tanyldy. Bul týraly Azamattyq avıatsııa komıteti habarlady.
- Qazaqstannyń halyqaralyq arenadaǵy kóshbasshy áýejaılary – Astana men Almaty taǵy da bedeldi marapat aldy. Almaty halyqaralyq áýejaıy Ortalyq Azııa men TMD boıynsha eń úzdik óńirlik áýejaı dep tanyldy, al 2-termınal álemdegi eń úzdik jańa termınal ataǵyna ıe boldy, - delingen habarlamada.
Nursultan Nazarbaev halyqaralyq áýejaıy Skytrax World Airport Awards 2025 syılyǵynyń «Ortalyq Azııa men TMD elderi áýejaılary arasyndaǵy eń úzdik personal» nomınatsııasy boıynsha jeńimpaz atandy.
Aıta keteıik, Nursultan Nazarbaev halyqaralyq áýejaıy birneshe ret aımaqtyq reıtıngterde kósh bastaǵan jáne Ortalyq Azııadaǵy jetekshi áýe haby retinde tanylǵan.
Skytrax World Airport Awards syılyǵy – avıatsııa salasyndaǵy halyqaralyq sapa etalony. Ol álemniń túkpir-túkpirinen jolaýshylar arasynda júrgiziletin táýelsiz saýalnamalarǵa negizdelgen.
Jeńimpazdar kelesi negizgi kórsetkishter boıynsha tańdalady:
– jolaýshylarǵa yńǵaılylyq;
– qyzmet kórsetý sapasy;
– ınfraqurylym deńgeıi;
– ınnovatsııany engizý.
Naýryzda habarlaǵanymyzdaı, elimizdegi áýejaılar men vokzaldarda qaýipsizdik jaǵdaıy tekserilip jatyr.
Eske salaıyq, bıyl halyqaralyq azamattyq avıatsııa uıymy (IKAO) Qazaqstannyń áýe qaýipsizdigine aýdıt júrgizedi.