Astana Memlekettik fılarmonııasynyń qazaq halyq aspaptary orkestri 13-shi maýsymyn ashty
ASTANA. Qyrkúıektiń 23-i. QazAqparat - Qyrkúıektiń 22-si kúni elordadaǵy Beıbitshilik jáne kelisim saraıynda Astana Memlekettik fılarmonııasynyń qazaq halyq aspaptary orkestri «Ásem án men tátti kúı» degen atpen óziniń 13-shi maýsymyn ashty,
dep habarlaıdy QazAqparat.
Qazaq halyq aspaptary orkestri 1998 jyly qurylǵan. Osy jyldar ishinde orkestr san alýan kontsertter ótkizip, mýzykalyq asyl muramyzdy dáriptep keledi. Orkestrdiń kórkemdik jetekshisi jáne bas dırıjeri, Qazaqstannyń eńbek sińirgen qaıratkeri, professor Aıtqalı Jaıymov.
Bıylǵy 13-shi maýsymynyń ashylýynda shyǵarmashylyq ujym álemdik mýzykanyń ozyq týyndylary men qazaq sazgerleriniń kúılerin oryndady. Sonymen qatar birqatar shyǵarmalarǵa Shamǵon Qajyǵalıev atyndaǵy respýblıkalyq dırıjerlar baıqaýynyń laýreaty, Memlekettik jastar syılyǵynyń ıegeri Dáýren Ǵylymov dırıjerlik jasady.
Shyraıly keshte Qazaqstan Respýblıkasynyń eńbek sińirgen ártisi Aıgúl Úlkenbaeva Aıtqalı Jaıymovtyń «Kúı-ana» shyǵarmasyn sheber oryndap, kórermenderdiń rızashylyǵyna bólendi.
Mádenıet qaıratkeri Qııaqbaı Asambaev «Beket ata - pir baba» ánin shyrqady.
