Astana mektepterinde qansha oqýshy orny jetispeıdi
ASTANA. KAZINFORM – AIMAQ podkastynyń jańa shyǵarylymynda Astana qalasy Bilim basqarmasynyń basshysy Qasymhan Senǵazyev bilim berý salasyndaǵy máselelerdi málimdedi.
Onyń sózinshe, qazir elordada 337 myńǵa jýyq oqýshy bar. Jylyna orta eseppen 15-16 myń túlek mektep bitiredi. Al bıyl 33 myń bala mektepke barǵan.
– Kelesi jyly 18 myń oqýshy bitirse, onyń ornyna mektepke 40 myń bala keledi. Bul – adamdy qýantatyn tsıfrlar. Infraqurylym áli jetpeıtini ras. Qazir 24 myń orynǵa mektep tapshylyǵy bar, – dedi maman.
Sonymen qatar, ol mektepterdegi oqýshy orny tapshylyǵy búkil shaharǵa emes, qaladaǵy keı aýdandarǵa qatysty túıtkil ekenin atap ótti.
– Almaty jáne Baıqońyr aýdandarynda mundaı másele joq. Almaty aýdanynda Toqpanov kóshesi boıynsha salynǵan jańa shaǵynaýdanda ǵana oryn jetispeıdi, onda mektep salynyp jatyr. Al Saraıshyq aýdanynyń kólemi úlken. Defıtsıttiń jartysyna jýyǵy Táýelsizdik saraıynan Nurly jol vokzalyna deıin, ıaǵnı Baıtursynuly jáne Nájimedenov kósheleri arasynda baıqalady. Sonymen qatar, “Han shatyrdyń” artynda, Esil aýdanyndaǵy “Samal” saıabaǵy salynǵan tusta, Seıfýllın kóshesiniń Kóktalǵa qaraı jalǵasy S-189 kóshesinde oryn jetispeý túıtkili bar. Al barlyq qala boıynsha mundaı másele joq, – dep qaıtalady Qasymhan Senǵazyev.
Aıta keteıik, buǵan deıin “Mekteptegi fakýltatıvterge qatysý mindetti me?” degen suraqtyń jaýabyn jarııalaǵanbyz.