Astana mektepterinde býllıng pen tóbelesti anyqtaıtyn AI júıesi iske qosyldy
ASTANA. KAZINFORM — Astana mektepterindegi qaýipsizdik júıeleri jańa oqý jylynyń bastalýyna oraı jetildirildi. Jobanyń qazirgi kezeńinde shamamen 2 myń beınebaqylaý kamerasy men 100 dabyl beretin SOS batyrmasyn ornatý josparlanǵan, dep habarlaıdy elorda ákimdiginiń resmı saıty.
Elorda mektepterindegi jumystardyń barysyn qalalyq Tsıfrlandyrý jáne memlekettik qyzmetter basqarmasynyń basshysy Berik Ahmetov tekserdi.
Jobanyń birinshi kezeńi aıasynda 2025 jyly Astanadaǵy 100 memlekettik mektepke 1 940 jańa beınebaqylaý kamerasy men 100 dabyl beretin SOS batyrmasy ornatyldy.
Sonymen qatar 122 mektepte burynnan ornatylǵan 6 900-den astam kamera biryńǵaı qaýipsizdik júıesine biriktirildi.
Bul rette tehnıkalyq ınfraqurylymdy keńeıtýge ǵana emes, jabdyqtardy biryńǵaı tsıfrlyq ortaǵa biriktirýge de erekshe mán berilip otyr. Búginde mektepterdegi 10 myńnan astam kamera qalanyń Ahýaldyq ortalyǵy men Astana qalasy Polıtsııa departamentiniń Jedel basqarý ortalyǵyna qosylǵan. Bul jaǵdaıdy ortalyqtandyrylǵan túrde baqylaýǵa jáne oqys oqıǵalarǵa jedel áreket etýge múmkindik beredi.
Sonymen qatar ıntellektýaldy beınesaraptama múmkindikteri de keńeıtilip jatyr. Jasandy ıntellekt tehnologııasyna negizdelgen júıe tóbeles, býllıng, kúdikti adamdar jáne basqa da shtattan tys jaǵdaılardy avtomatty túrde anyqtap, tıisti qyzmetterge sıgnal jiberedi.
— Balalardyń qaýipsizdigi — qala úshin sózsiz basymdyq. Biz kameralar, dabyl túımeleri jáne AI-beıneanalıtıka ózara baılanysta jumys isteıtin júıe qalyptastyryp jatyrmyz. Bizdiń mindetimiz — oqıǵalardy jaı ǵana tirkeý emes, yqtımal qaýipterdi der kezinde anyqtap, áreket etý ýaqytyn barynsha jyldamdatý. Oqý jyly bastalar aldynda barlyq ınfraqurylymnyń turaqty jumys isteıtinine jáne mektepterdiń qajetti qaýipsizdik deńgeıin qamtamasyz etýge daıyn ekenine kóz jetkizý asa mańyzdy, — dedi basqarma basshysy Berik Ahmetov.
Tekserý barysynda montaj jumysynyń qarqyny men sapasy, kameralardyń qamtý aımaqtary, dabyl túımeleriniń jumys isteýi, beınejazbalardyń turaqty berilýi jáne beıneanalıtıka quraldarynyń jumysy tekserildi.
Jobanyń qorytyndy kezeńi 2027 jylǵa josparlanǵan. Ol mektepterdegi qaýipsizdik ınfraqurylymyn odan ári keńeıtýdi kózdeıdi. Úsh kezeńniń qorytyndysy boıynsha Astananyń memlekettik mektepterinde 5 800-den astam jańa beınebaqylaý kamerasy jáne 300 dabyl beretin SOS túımesi ornatylady.
Jobany iske asyrý elorda mektepterinde beınebaqylaý, dabyl túımeleri jáne ortalyqtandyrylǵan monıtorıngti biriktiretin biryńǵaı tsıfrlyq qaýipsizdik júıesin qalyptastyrýǵa múmkindik beredi. Bul qaýip-qaterlerdi der kezinde anyqtap, olarǵa jedel áreket etýge jaǵdaı jasaıdy.
Aıta keteıik, joba Astana qalasy ákimdiginiń Tsıfrlandyrý jáne memlekettik qyzmetter basqarmasy men «Astana Innovations» AQ birlesip júzege asyryp jatyr.
Osyǵan deıin bıyl eń kóp mektep paıdalanýǵa bergen óńirler belgili boldy.
