Astana mektepterinde bir psıholog 1,5 myń balaǵa kómek berip júr - depýtat

ASTANA. KAZINFORM – Astana qalasy máslıhatynyń tóraǵasy Erlan Kanalımov Senatta ótip jatqan dóńgelek ústelde elorda mektepterinde psıhologterdiń tapshylyǵy ózekti másele bop turǵanyn aıtty.

«Elordanyń bilim berý uıymdarynda 228 psıholog jumys isteıdi. Bir psıhologke 1000-nan 1500 balaǵa deıin keledi. Psıhologter kóptegen balalarmen tıisti deńgeıde baılanys ornata almaıdy. Bul júrgizilip jatqan jumystyń sapasyna tikeleı áser etedi. Biz mektep psıhologteriniń otbasymen tikeleı jumys isteý daǵdylary jetispeıtinin baıqaımyz. Osyǵan baılanysty balanyń psıhıkalyq-emotsıonaldyq jaǵdaıyn zertteý, táýekel tobyndaǵy balalardy anyqtaý, otbasymen jumys isteý máseleleriniń bir aýtsorsıngke berý jáne ony zańnama deńgeıinde retteý qajet dep esepteımiz», - dedi depýtat.

Sondaı-aq, ol Oqý-aǵartý mınıstrligine táýekel tobyndaǵy balalarmen jumystyń ádistemesin ázirleýdi usyndy.

«Bilim berý uıymdaryndaǵy táýekel tobyndaǵy balalarmen jumys isteý algorıtmi zańmen rettelmegen. Táýekel tobyndaǵy balalarmen jumys isteý ádistemesi joq. Oqý-aǵartý mınıstrligine táýekel tobyndaǵy balalarmen jumys isteý boıynsha ádistemelik usynymdar ázirleýdi usynamyz», - dedi Erlan Kanalımov.