Astana mektepteriniń birinde oqıtyn balanyń taǵdyry arqaý bolǵan kitap jaryq kórdi

ASTANA. 21 aqpan. QazAqparat - Búgin Astanadaǵy S. Seıfýllın murajaıynda QR mádenıet qaıratkeri, Y. Altynsarın medaliniń ıegeri, belgili balalar jazýshysy Tolymbek Ábdiraıymnyń «Alabuǵa aýlaǵan kún» atty jańa jınaǵynyń tusaýy kesildi.

Qazaqstan Jazýshylar odaǵynyń Astana qalalyq fılıaly uıymdastyrǵan bul sharaǵa belgili aqyn-jazýshylar men №50 «Qazǵarysh» mektep-lıtseıiniń oqýshylary qatysty.

QR Mádenıet jáne aqparat mınıstrliginiń baǵdarlamasy boıynsha «Balalar ádebıeti» baspasynan jaryq kórgen atalmysh jınaqqa jazýshynyń «Tunjyr» hıkaıaty men áńgimeleri, ertegileri, mysaldary toptastyrylǵan.

Kitap avtorynyń aıtýynsha, «Tunjyr» povesi Astana qalasynyń bir mektebinde oqıtyn Aıbol esimdi balanyń taǵdyry týraly baıandaıdy.

«Qazir HHІ ǵasyr - ǵylymnyń damyǵan, elektronıkanyń óristegen, jahandaný jaılaǵan zaman deımiz. Alaıda nege adamzat balasy baýyrmaldyqty, janashyrlyqty umytýy kerek? Nege bizde qarttar úıi kóbeıip jatyr? Nege jetimder úıi tolyp ketti? Bul tek qazaqtyń basynda turǵan másele emes, bul jahandanýdyń kúlli álemge alyp kelgen qasireti. Mine, osy máseleni kóterýge tyrystym», - deıdi T. Ábdiraıym.

Poveste áke-sheshesi ajyrasyp, ógeı shesheniń qorlyǵyn kórgen, basynan nebir qıyn-qystaý kezder ótken jetkinshektiń ómiri sýretteledi.

«Osy balanyń taǵdyry arqyly oqyrman qaýymǵa oı salǵym keldi», - deıdi avtor.

T. Ábdiraıym 7 prozalyq jınaqtyń avtory. Sonyń beseýi balalar men jasóspirimderge arnalǵan.