Astana mektepteriniń 90 paıyzynda erekshe balalarǵa jaǵdaı jasalǵan
ASTANA. QazAqparat - Elorda mektepterindegi erekshe kútimdi talap etetin balalardy oqytý jaǵdaıy týraly qalalyq bilim basqarmasynyń basshysy Ánýar Janǵozın ákimdik otyrysynda málim etti, dep habarlaıdy QazAqparat tilshisi.
«Erekshe qajettilikti talap etetin balalardyń barlyǵy da kóppen birdeı bilim alýǵa, qoǵammen birge bolýǵa quqyǵy bar. Ol baǵytta bizde birqatar sharýa atqarylyp, jumys protsesi óz nátıjesin berip otyr. Búgingi kúni Astanada 90% mektepte erekshe kútimdi talap etetin balalardy oqytýǵa jaǵdaı jasalǵan. Sondaı-aq, 13 balabaqshada arnaıy ashylǵan túzetý toptary bar, odan bólek qaladaǵy 4 kolledj ınklıýzıvti bilim berý baǵdarlamasymen jumys isteıdi», - dedi bilim basqarmasynyń basshysy.
Onyń aıtýynsha, búginde elordada erekshe kútimdi talap etetin 6 myń oqýshy bar, onyń 80%-y talapqa saı bilimmen qamtylǵan.
«Sońǵy ýaqytta memleket tarapynan jan basyna beriletin qarajatqa da kóńil bólinip keledi. Mysaly, balabaqshalarǵa memlekettik tapsyrys boıynsha qarapaıym balaǵa 27 myń teńge bólinse, erekshe qajettilikti talap etetin balaǵa 50 myń teńge bólinedi. Bul degenimiz onyń tamaǵymen qosa, basqa da qajettilikterin jaýyp otyr degen sóz. Mektep jasyndaǵy osy kategorııaǵa jatatyn balalarǵa bólinetin qarajat ta eki ese ulǵaıdy», - dedi ol.
Á. Janǵozınnyń deregine súıensek, Astanada aýtızmmen aýyratyn balalar kórsetkishi sońǵy úsh jylda 3,7%-ǵa artyp otyr.
Bilim basqarmasy qolǵa alynyp jatqan taǵy bir mańyzdy is - túzetý jáne ońaltý ortalyǵyndaǵy balalardyń sanyn azaıtyp, olardy mekteptegi ınklıýzıvti synyptarǵa kóshirý.
