Astana mektepterine jańa pán engiziledi
ASTANA. QazAqparat - Kelesi oqý jylynan bastap elorda mektepterine jańa «Psıhologııa jáne ózin-ózi damytý» páni engiziledi. Bul týraly ElordaInfo habarlaıdy.
«Kelesi jyldan bastap Astananyń bilim berý júıesine arnaıy balalar psıhologııasy jáne ózin-ózi damytý páni enedi. Bul pán tek kitaptaǵyny oqytýmen shektelmeıdi. Balalarǵa ózderin kim ekenin túsinýge kómektesetin ınteraktıvter men trenıngter qoldanylady. Kýrs birneshe mektepke yǵńaılanyp ázirlendi. Jańa pán 5 synyptyń mektep baǵdarlamasyna engiziledi», - dedi «Astana daryny» daryndylyqty damytý jáne psıhologııalyq qoldaý ortalylyǵynyń ǵylymı konsýltanty Aleksandr Teslenko.
Ǵylymı konsýltant Dúnıejúzilik densaýlyq saqtaý uıymynyń mektep oqýshylarynyń 70 % túzetý kómegine muqtaj ekenin mysalǵa keltirdi. Zamanaýı balalar ıllıýzııalyq álemde ómir súredi, ómirdiń qıyn kezeńinde ózderin qalaı ustaý kerektigin bilmeıdi. Bul elordalyq oqýshylarǵa da qatysty.
«Astanada qalyptasqan jaǵdaı alańdatarlyq - sýıtsıd jasaýǵa árekettený nemese óz-ózine qol salý bar. Kóp jaǵdaıda bul árekettiń sebebi anyqtalmaı jatady. Balalar kóptegen stresstik faktorlardyń ortasynda qalyp, eń sońynda jınaqtalyp sońy qaıǵyly jaǵdaımen aıaqtalady. Sebebi olar ózderin ekstremaldyq jaǵdaıda qalaı ustaý kerektigin bilmeıdi. Mektep psıhologtary osyndaı jaǵdaıda ózderin qalaı ustaý kerektiginiń stsenarııi men algorıtmin berip otyrady. Sabaq fakýltatıv retinde ótkenimen onyń baǵasy attestatqa engiziledi», - dedi ol.
Balalardyń psıhologııalyq jaǵdaıyn kompıýterlik dıagnostıka arqyly anyqtaıtyn bolady. Ol úshin qalada segiz dıagnostıkalyq ortalyq ashý josparlanyp otyr. Negizinen olar mektepterde bolady.
«Astananyń Bilim basqarmasy psıhologııalyq jaǵdaıyn kompıýterlik dıagnostıka ádistemesin alý úshin Sankt-Peterbýrgtiń fırmasymen kelisim jasaıdy. Oqýshylar dıagnostıkany kompıýterlik ortalyqtarda ótedi. Psıhologtar balalaryń jaǵdaıyn avtomatty túrde óńdelgen nátıjeni alady. Biz táýekeldi topqa jatatyn topty anyqtaýǵa qajetti aqparatty alyp, ári qaraı maqsatty túrde solarmen jumys isteımiz», - dedi A. Teslenko.
Buǵan qosa mektep psıhologtarynyń biliktiligin arttyrýǵa asa mán beriletinin aıtty.
«Bizdiń psıhologtardyń daıyndyǵy zamanaýı tájirıbege sáıkes kelmeıdi. Sondı-aq maman tapshylyǵy jıi kezdesedi. Kóbine eńbek aqy kólemi unamaıdy. Jańa pán qarjylyq qalyptastyrýy jaqsartýǵa septigin tıgizedi. Sonymen birge psıhologtarǵa arnalǵan oqý semınarlaryn ótkizýdi kózdep otyrmyz», - dedi Aleksandr Teslenko.
Sóz sońynda konsýltant Astanada áleýmettik psıhologııalyq kómek qyzmeti tutas ózgertiletinin aıtty. Ata-analar klýbtary qurylyp, onda psıhologtar ata-analarǵa kez kelgen jaǵdaıda ózderin qalaı ustaý kerektigine usynys beretin bolady.
