Astana mektepterindegi medıatsııa ınstıtýty Qazaqstannyń ózge óńirlerinde de qoldanylady

Bul týraly búgin Astanada medıatorlar tájirıbesiniń alǵashqy qorytyndylary shyǵarylǵan dóńgelek ústel barysynda, joba jetekshisi, «Astananyń kommertsııalyq emes uıymdarynyń forýmy» zańdy tulǵalar birlestiginiń basshysy Baıan Ahmetjanova málim etti.

Byltyr kúzde «Bota» qoǵamdyq qorynyń qarjylandyrylýymen qolǵa alynǵan baǵdarlama aıasynda medıatorlar ortalyǵy qalanyń 3 mektebinde ilki joba retinde iske asyrylǵan bolatyn. Bul jumysqa elordadaǵy 20-ǵa tarta úkimettik emes uıym tartylyp, elorda mektepteriniń birqatar ustazdary arnaıy kýrstardan ótken.

Baıan Ahmetjanovanyń aıtýynsha, qazaqstandyq medıatorlardy Ispanııa men Bolgarııa elderiniń beldi ýnıversıtetterinen kelgen mamandar daıarlaǵan.

«Alǵashqy jartyjyldyq jumystyń qorytyndylary kóńil kónshiterlik. Endi budan bylaı tájirıbe retinde elordanyń 3 mektebinde engizilgen jobany basqa óńirlerge de tarata bastaımyz», - dedi ol.

Qatysýshylar medıatsııa ınstıtýtynyń engizilýi kámeletke tolmaǵandar arasyndaǵy údep bara jatqan qylmystyq oqıǵalardy azaıtyp, balalardyń bir-birimen qarym-qatynasynda shıelenisterdiń tómendeýine septigin tıgizedi dep otyr.

Eske sala keteıik, Memleket basshysy daýlardy sheshýdiń qosymsha ádisi retinde elimizde medıatsııa ınstıtýtyn engizýge baǵyttalǵan «Medıatsııa týraly» Qazaqstan Respýblıkasynyń Zańyna qol qoıǵany belgili.