Astana mektepterinde kásibı daıyndyq synyptary ashylady
ASTANA. QazAqparat - Elordadaǵy 24 mektepte 10 synyp oqýshylary úshin 2 jyl oqý merzimimen beıindi jáne kásibı daıyndaý synyptary ashylady, dep habarlanǵan Astana qalasy ákimdiginiń saıtynda.
Qaladaǵy polıtehnıkalyq kolledjde Memleket basshysy Nursultan Nazarbaevtyń 2015 jylǵy 30 qarashadaǵy «Qazaqstan jańa jahandyq naqty ahýalda: ósý, reformalar, damý» atty Qazaqstan halqyna Joldaýy talqylandy. Astana qalasy ákiminiń orynbasary Ermek Amanshaevtyń jáne Bilim basqarmasynyń basshysy Elmıra Sýhanberdıevanyń tóraǵalyǵymen ótken sharaǵa qalalyq bilim mekemeleriniń basshylary qatysty. Nursultan Nazarbaev bıylǵy Joldaýynda kásibı bilim berýge erekshe nazar aýdardy. 2017 jyldan bastap jańa joba - «Barshaǵa arnalǵan tegin kásibı-tehnıkalyq bilim» baǵdarlamasy iske qosylady. Memleket basshysynyń tapsyrmalaryn oryndaý, sondaı-aq joǵary synyp oqýshylaryn mamandyq tańdaýǵa daıyndaý úshin 2016 jyldyń 4 qańtarynan bastap elordalyq mektepterde oqýshylardy kásiptik baǵdarlaý boıynsha joba júzege asyrylady. 24 mekteptiń (№ 4, 7, 8, 13, 14, 18, 19, 24, 25, 28, 29, 34, 36, 37, 40, 41, 44, 45, 49, 53, 55, 57, 61, 69) 10 synyp oqýshylary úshin 2 jyl oqý merzimimen beıindi jáne kásibı daıyndaý synyptary ashylady. Oqýshylardy oqytý shashtaraz sheberi, tiginshi, bala kútýshi, elektrondy esepteý mashınalarynyń operatory, hatshy-referent, barmen, daıashy mamandyqtary boıynsha júrgiziledi. Oqytýdyń teorııalyq bólimi mektepterde, al praktıkasy kolledjderdiń bazasynda ótetin bolady. Jumyspen qamtý ortalyǵynyń málimetinshe, Astanada suranysqa ıe mamandyqtar - tehnık-qurylysshy, tas qalaýshy, túrli júıelerdi jáne qondyrǵylardy montajdaýshy, baılanys montajdaýshysy, elektrık, elektrgazben dánekerleýshi, qurylys mashınalarynyń jáne mehanızmderiniń mashınısti, kran mashınısti, júk kóliginiń júrgizýshisi, dánekerleýshi-santehnık, mektepke deıingi mekemeler tárbıeshisi, tiginshi, meıirbıke, aspazshy, naýbaıshy, kondıter, satýshy, býhgalter, ákimshi, shashtaraz jáne t.b. Jyl basynan beri 29 jasqa deıingi 6420 qala turǵyny jumysqa ornalasýǵa kómektesý týraly ótinish berdi. Sonyń ishinde 589 adam jastar tájirıbesinen ótýge, 38-i áleýmettik jumys oryndaryna jiberildi. 2850 adam tólenetin qoǵamdyq jumystarǵa kiristi, al 204-i kásiptik oqýǵa qabyldandy.
