Astana mektepterinde ata-analardan turatyn belsendiler toby jasaqtalmaq
ASTANA. QazAqparat - Astana qalasynyń Bilim basqarmasy ata-analardan turatyn belsendiler tobyn qurýdy josparlaýda, dep habarlaıdy QazAqparat vedomstvonyń saıtyna silteme jasap.
«Ata-analar qaýymdastyǵymen birlese otyryp, elordalyq bilim uıymdarynda ashyqtyq saıasatyn ornatý, ata-analardyń mektep ómirine belsendi qatysý, sonymen qatar balalardyń jaǵdaıyn jaqsartýǵa baǵyttalǵan is-sharalar jıyntyǵyn iske asyrý maqsatynda ata-analardan turatyn belsendiler tobyn qurýdy josparlaýda», - delingen habarlamada .
Qurylǵan top mektepterdi jańa oqý jyly qarsańynda qabyldaıtyn komıssııanyń quramyna kirip (ıaǵnı ǵımarattyń oqý jylyna qanshalyqty daıyn ekendigin tekserý maqsatynda), sondaı-aq kolledjderge qujattardy qabyldaý barysynda baıqaýshy retinde qatysýǵa múmkindik alady.
Keleshekte osy tizimdegi ata-analardyń qalalyq tamaqtaný sapasyn baqylaý komıssııasy quramyna enýi josparlanyp otyr.
Bilim basqarmasy atalmysh top quramyna kirýge qyzyǵýshylyq tanytqan ata-analardan 11 tamyzǵa deıin ótinish qabyldaıdy.
